Ерменското Министерство за одбрана соопшти дека азербејџанските сили го гранатирале Степанакерт, главниот град на самопрогласената република Нагорно Карабах, а на Фејсбук објави видео од последиците од тоа гранатирање.
На видеото се гледаат кратери по експлозија на гранати, урнатини на згради, автомобили закопани во урнатините.
Претходно беше објавено дека жени и деца го напуштаат Степанакерт поради гранатирање. Речиси сите жители ги напуштија градовите во Карабах, кои се на линијата на контакт со вооружените сили на Азербејџан.
Од Азербејџан, пристигнуваат поинакви информации за тековниот конфликт околу Нагорно Карабах. Ракетите летаат од Степанакерт кон азербејџанските градови, Баку одговара на огнот, тврди денеска Министерството за одбрана на Азербејџа,појаснувајќи дека е извршен ракетен напад од територијата на Степанакерт врз азербејџанските градови Тертер и Хорадиз, кои граничат со Нагорно Карабах.
„Во моментов, ерменските вооружени сили од територијата на Ханкенди (Степанакерт) истрелуваат ракети кон градот Тертер и градот Хорадиз во областа Фузули“, се вели во соопштението.
Министерството вели азербејџанската армија „презема соодветни мерки“.
Официјални лица од Нагорно Карабах соопштија дека досега се убиени над нивни 150 војници Азербејџанските власти не дадоа детали за нивните воени жртви, но соопштија дека биле убиени 19 цивили и уште 55 ранети.
Вахрам Погосијан, портпарол на претседателот на Нагорно Карабах, вчера на Фејсбук напиша дека разузнавачките податоци покажуваат дека околу 3.000 Азербејџанци загинале во борбите, но не даде детали.
