Времето денеска ќе биде променливо облачно со повремени врнежи од дожд, пообилни во источните делови каде ќе наврнат над 15 литри на квадратен метар. Ќе дува слаб до умерен ветер од северен правец. Минималната температура ќе биде во интервал од 4 до 10, а максималната ќе достигне од 12 до 17 степени.
И во Скопје ќе биде променливо облачно со повремени врнежи од дожд. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне 16 степени.
Според најавата од Управата за хидрометеоролошки работи (УХМР), и утре ќе биде променливо облачно со сончеви периоди и со услови за локална појава на нестабилност со пороен дожд, грмежи и засилен ветер.
В недела, пак, ќе има брз продор на студена воздушна маса од север и врнежи од дожд, а на планините и на повисоките места од снег.
-Ќе дува засилен северен ветер, температурите значително ќе опаднат и врнежи од снег се очекуваат и во некои од пониските места. Во понеделник наместа ќе провејува слаб снег, а утринските температури на повеќе места ќе бидат негативни, соопшти УХМР.
Водостојот на повеќето реки низ државата е над просекот за април, покажуваат дневните мерења на Управата за хидрометеоролошки работи.
Евидентирано е зголемување на нивото на реката Вардар кај Јегуновце, Скопје и Велес, на Треска кај Македонски Брод, на Пчиња кај Катлановска Бања, како и на Црна Река кај Новаци.
Намалување под просекот имаат реката Црн Дрим кај Ложани, Сатеска кај Ботун, Брегалница кај Берово и Крива река кај Крива Паланка.
Според УХМР, нивото на водата во Дојранското, Преспанското и во Охридското Езеро е во рамки на просекот за април.
Фото: МИА архива
