Во Илинденските чествувања во Бигорски манастир, покрај Свечената литургија беше извршен и чинот на доксологија – молитва за татковината, објави порталот Поглед.

– Во Бигорскиот соборен храм на чесниот Претеча се изврши пригодниот чин на доксологија – молитва за покој на душите на паднатите борци на браникот од верата и татковината наша, како и молитва за просветлување на државните власти и за запазување на нашата држава. Притоа, нашето братство ја испеа химната на македонските револуционери, која е воедно и првата македонска химна – Изгреј зора на свободата, како и современата наша химна – Денес над Македонија, изјави отец Кирил од Бигорскиот манастир.

На крајот од свечената доксологија, архимандрит Партениј, игумен на манастирот, упати честитка по повод големиот национален празник Илинден и црковниот спомен на Светиот славен Пророк Илија и посака вечен спомен за хероите кои на бојното поле ја полагале душата своја за ближните и за татковината.

– Заради подвизите и молитвите на нашите светии, на просветителите и преродбениците, на народните херои и великани на духот, кои многу добро знаеле што биле, за што се бореле и за што се жртвувале, да стоиме и ние цврсто во слободата со која не ослободи Христос, за да не ја изгубиме и политичката слобода, рече архимандрит Партениј.

Посака Господ да не чува во преслатката слобода Христова, да ни ја чува татковината, да ги просветлува оние на кои им е дадена власт да не водат и да им каже „добри зборови во срцата нивни за Црквата и за целиот Негов народ“.

– Одговорноста на оние што имаат раководни места е голема и треба не само да ги критикуваме, туку да се молиме за нив. Од своја страна и тие треба да бидат свесни за положбата што ја имаат, бидејќи оној кој добил призив да води народ, било во црквата или во државата, тој треба да биде, пред се, слуга. Како што вели и самиот Христос: Кој сака да биде прв, нека биде последен од сите, и слуга на – сите! Доколку тие што се наоѓаат на раководните места во Црквата и во државата се трудат да живеат согласно оваа божја заповест, да се жртвуваат и да служат, тогаш ќе имаме многу помалку проблеми во целото наше општество. Христос да не пази и да не чува сите. Нека ни е вечна татковината, порача архимандрит Партениј.

За нашата Македонија да им добра иднина, посочи тој, неопходно е да има добра дипломатија. За добрата перспектива на државата, неопходна е не само добра надворешна, ами и внатрешна политика. Господ да ги просветлува сите што имаат одговорни положби и да ги чува особено од страста на среброљубието, бидејќи како што сведочи Светото Писмо, најстрашната и најпогyyбна страст за човекот е сребpoљубието, љубовта кон парите и материјалните богатства.

– Да се води една сериозна политика е многу тешко, затоа што таа бара голема мудрост, внимателност, љубов кон Татковината, далекусежност и пред сѐ, просветление од Бога. Следствено, таа воопшто не треба да биде популистичка, ефемерна и теснопартиска, заснована на лични интереси Среброљубивиот ги затвора ушите и срцето за другите, се насочува само кон своите ниски егоистични страсти и цели. За такви примери слушаме постојано од јавните гласила – како некои од народните избраници посегнуваат по државата каса. Е, тоа е најголемиот грев, зашто тоа не е само личен грев, туку грев против целата заедница. Таквите нечесни работи најмногу ја уназадуваат државата. Затоа ние треба да се молиме секогаш за оние кои управуваат, бидејќи лесно е да ги критикуваме, но многу потешко е да се молиме за нив, како што и ни заповеда Црквата Божја. Нека ни е на помош Свети Илија и да ни дава христијанска ревност и љубов на сите нас и особено на тие што не водат и нека ни ги сочува државата и Црквата до крајот на вековит, рече отец Партениј.

Во Бигороскиот манастир, во присуство на голем број верници од сите краишта на државава беше одржана утрена Света Литургија, а традиционално архимандрит Партениј, со дел од братството, отслужи Света Евхаристија во храмот на „ Свети Георгиј Победоносец“ во живописното село Лазарополе.