Има голем баласт од непотребни работи кои денес ги учат нашите деца, изјави денеска премиерот Зоран Заев.
Тој рече дека при подготовката на реформата во основното образование ќе бидат консултирани сите засегнати. Целта, е додава Заев, со реформата да се максимализираат содржините што ќе биде од помош на учениците.
– Мислам дека пред се ќе ја консултираме фелата. Тоа се учителите и наставниците од шесто до деветто одделение, но и универзитетите, МАНУ, имаме многу експертски фели, институти, кои работат за да може да го согледаме најисправниот терк на самата реформа. Да упатам уште еднаш порака, сите сме или родители или дедовци, баби. Имаме деца во училиштата. Сите знаеме дека мора да го реформираме основното образование. Зошто? Заради тоа што имаме еден голем баласт на непотребни работи кои ги учат нашите деца, а со тоа го скратуваат нивното внимание во другите активности, рече Заев, одговарајќи на новинарско прашање на настан организиран на Пониква.
