Премиерот Зоран Заев на вчерашната трибина на СДСМ „На прав пат“ во Велес, освен пофалби за сработеното на Владата, навреди за опозицијата и лидерот Христијан Мицкоски и и критики до правосудсниот систем се закани и до поранешниот премиер Никола Груевски.
Заев пред велешани вети дека ќе има целосен ветинг на судиите и обвинителите, со цел да се расчисти со корумпираните во нивните редови.
Тој рече дека многу малку случаи кои ги отвори СЈО имаат судска разрешница, а особено го нагласи предметот „Траекторија“, за кинеските кредити за автопатите Миладиновци – Штип и Кичево – Охрид.
Пред неколку дена Кривичниот суд донесе одлука да го запре судењето за Груевски поради застареност на делото, а државата да му ги плати судските трошоци. За останатите обвинети судскиот процес ќе продолжи.
-Груевски се спасил со застареност за кинеските кредити. Додека јас дишам Груевски нема да се спаси. Нема да се спаси заради тоа што предметот е жив. Предметот ќе тече, ќе се донесат одлуки. Ќе се дознае целата вистина и на крајот ќе си одговараат сите. Јас верувам дека Груевски е главата на ова дело, заради тоа што тие 5 посто, тие 15 милиони евра провизија, ги договорил, ги организирал и ги земал тој. Јас сум го слушнал ова, но судот треба да го докаже, рече Заев.
Така е на трибините „На прав пат“, а во секојдневниот живот, власта на Заев пушта во сообраќај електолокомотиви што ги купил Груевски, игра чочеци на автопати што ги изградила претходната власт и ги поканува масовно да учествуваат кинески компании на тендерите што ги распишува актуелната власт.
