Претседателот Стево Пендаровски по четири години откако е избран за шеф на државата и кога возеше Југо, за првпат остана без плата заедно со неговиот кабинет и 63 службеници. Тој и неговиот кабинет за првпат почуватвуваа како им е на илјадници работници на кои платите им доцнат и многу подолго.
Вообичаено платите на сите им се исплаќаат на први во месецот, сега им доцнат осум дена. Од Министерството за финансии не се загрижени што Пендаровски, 55 јавни службеници, пет советници и три именувани лица, се уште немаат земено плата. Оттаму посочуваат дека навремено ќе биде исплатена, што би значело дека ќе го запазат рокот до 15-ти во месецот. Kабинетот на претседателот посочува дека се одржувале и состаноци со ресорното министерство.
„Во однос на тоа што може да се направи, Кабинетот достави образложение до Министерството за финансии, одржани се и состаноци меѓу претставници на двете институции и се работи на надминување на пречките за решение на проблемот“, велат од Кабинетот на Пендаровски за „Макфакс“.
Министерството за финансии пак, наместо одговор каде е проблемот што платата не е исплатена како што е вообичаено, на 1-ви во месецот, испратија објаснување дека претседателот со вработените ќе добие пари во законскиот рок.
„Министерството за финансии преку секторот Трезор редовно и навремено ги реализира налозите на буџетските корисници за исплата на плата на вработените, согласно законските прописи. Посочуваме дека процесот на исплата на платите на вработените во јавниот сектор е регулирано и се спроведува врз основа на Законот за буџети и Законот за извршување на буџети, а согласно обезбедени финансиски средства“, посочуваат од ресорното министерство за „Макфакс“.
Последниот состанок помеѓу Кабинетот на Пендаровски и претставници од кај министерот Фатмир Битиќи се одржала вчера. И на таа средба е објаснето дека не се бара исплата на екстра пари од буџетот, туку со веќе заштедени средства треба да им се зголемат платите за 5% на 55 државните службеници. Од Кабинетот на Пендаровски и претходно објаснија дека барањето за јануарската плата е изработено согласно законот.
