На седницата на Советот за безбедност на ОН, Русија остана сама во оспорувањето на новиот висок претставник во БиХ, германскиот политичар Кристијан Шмит, додека американскиот претставник кажа дека тоа е завршена работа и дека тој ќе ја преземе функцијата на 1 август.
На барање на мисијата на Руската Федерација во Советот за безбедност, вчера се одржа расправа за назначувањето на Шмит. Рускиот претставник Василиј Небензија кажа дека согласноста за новиот висок претставник треба да ја дадат сите страни во БиХ и Советот за безбедност на ОН, што, според него, не се случи.
Советот за имплементација на мирот (ПИК), што го надгледува и ги дава насоките за работата на Канцеларијата на високиот претставник во БиХ (ОХР) и е составен од претставници на водечките западни земји, Русија и Турција, како претставник на Организацијата за исламска соработка (ОИЦ) ), неодамна го назначи Шмит за наследник на Валентин Инцко. Одлуката беше донесена со противење на Русија.
Претставникот на Руската Федерација на дебатата пред Советот за безбедност ги повтори идентичните ставови, тврдејќи дека присилното назначување на Шмит може да ја загрози стабилноста во БиХ.
Заменик-амбасадорот на САД во ОН, Ричард М. Милс, кажа дека назначувањето на новиот висок претставник во БиХ е завршена работа. Според него, доволна е согласноста за назначувањето од ПИК и Советот за безбедност не мора да одобруваат назначување нов шеф на ОХР за тој да ја преземе функцијата. Другите западни дипломати, исто така, го поддржаа новоизбраниот висок претставник, кој доаѓа од Германија.
Иако претседавачот со Претседателството на БиХ, Милорад Додик, се обиде да издејствува министерката за надворешни работи Бисера Турковиќ, инаку висок функционер на водечката бошњачка партија СДА, да не учествуваше во дебатата, тоа не се случи. Затоа таа беше остро критикувана од руски дипломат пред Советот за безбедност на ОН.
Небензија изјави дека добил писмо од Додик во кое се вели дека министерката Турковиќ нема одобрение или договорена позиција да зборува на дебатата. Министерката Турковиќ, пак, кажа дека таа, исто така, нема информации дали Василиј Небензија има одобрение од рускиот министер Сергеј Лавров да и поставува такви прашања.
Турковиќ пред СБ на ОН побара ОХР да продолжи со работа, наведувајќи дека условите за негово затворање се уште не се исполнети, што, пак, го бара српската страна во БиХ.
