По наредба на руското Министерство за надворешни работи денеска е затворено московското биро на канадската телевизија Си-Би-Си (CBC) и притоа руските власти ги повлекуваат и визите и акредитациите на новинарите на овој јавен радиодифузен сервис, откако Канада ја забрани руската државна телевизија „Русија тудеј“, јави ДПА.
-Со жалење и натаму забележуваме отворени напади врз руските медиуми од земјите на таканаречениот колективен Запад што себе си се нарекуваат цивилизирани, изјави Марија Захарова, портпаролка на руското Министерство за надворешни работи.
„Донесена е одлука да се преземат одмазднички, нагласувам одмазднички мерки во врска со акциите на Канада: затворање на московското биро на Канадската радиодифузна корпорација, вклучително и поништување на акредитациите и визите на нивните новинари, додаде таа, пренесува ДПА.
