Француската полиција започна потрага по претседателот на Меѓународната полициска организација (Интерпол), Кинезот Менг Хонгвеј, откако неговата сопруга пријавила дека „нема никаков глас“ од него по неговото заминување за Кина минатата недела.
Извори од француската полиција соопштија дека сопругата на Менг го пријавила исчезнувањето во полициска станица во Лион, каде се наоѓа седиштето на Интерпол.
Таа, според истите извори, изјавила дека нема никакви информации каде се наоѓа Менг, откако тој заминал за Кина на 29 септември.
Претставник на француските правосудни власти, кој побарал анонимност, соопшти дека Менг отпатувал од Франција и пристигнал во Кина „кон крајот на сепетмври“.
Менг, кој заедно со сопругата и децата живее во Лион, беше избран за претседател на Интерпол во ноември 2016 година, со мандат од четири години. Пред изборот на водечката позиција во Интрепол, Менг беше потпретседател на кинеската Комисија за контрола на наркотиците и директор на Националната служба за борба против тероризмот.
По неговиот избор за прв човек на Интерпол, повеќе меѓународни организации за заштита на човековите права реагираа дека Кина би можела да го искористи Менг за прогон на кинески дисиденти во странство.
На ваквите стравувања, Интерпол одговори дека Уставот на организацијата им забранува на нејзините службеници да се мешаат во политиката.
Меѓународната полициска организација соопшти дека е запозната со информациите за „претпоставеното исчезнување“ на нејзиниот претседател Менг Хонгвеј, додавајќи дека случајот сепак е во надлежност на соодветните органи на Франција и Кина.
Како што јави ДПА, Интерпол во соопштението посочува дека „исчезнувањето“ на Менг не влијае врз работата на организацијата, бидејќи за секојдневното раководење со неа е одговорен генералниот секретар.
– Генералниот секретар на Интерпол нема повеќе да го коментира случајот, се посочува во соопштението.
