Јавното претпријатие за државни патишта под власт на ДУИ и СДС плаќа најскапо косење на трева во регионот. Ова јавно претпријатие за договор за косење на трева на македонските патишта одвојува 2 милиони евра, а цените по кои ги тарифира поединечните услуги се неколкукратно поскапи од тие во регионот, рече на денешната прес-конференција портпаролот на ВМРО-ДПМНЕ, Марија Митева.
– За потребите на оваа прес конференција направивме споредба на договор за одржување на патишта и косење на трева во соседна Србија. Цената која ја плаќа Јавното претпријатие за државни патишта за косење на м2 тревна површина според овој договор е 12 денари. Цената пак која за м2 ја плаќа српското претпријатие за патишта е еквивалент на 2 и пол денари, додека пак косење на трева на површини со тежок пристап, околу патни знаци и околу заштитна ограда е еквивалент на 5 денари. Кога ќе се извади средната вредност се доаѓа до цена на нешто под 4 денари за м2, односно 3 пати помалку во однос на тоа што го плаќа Јавното претпријатие за државни патишта, рече Митева.
Натаму додаде:
– Прашуваме на што се должи 3 пати повисоката цена која ја плаќа Јавното претпријатие за државни патишта во Македонија во однос на цената која се плаќа во Србија за косење на м2 тревна површина покрај патот? Како може за една услуга во Македонија нашите претпријатија да плаќаат три пати повеќе од тоа што плаќаат исти такви претпријатија во регионот? Воедно, во Македонија оваа власт на ДУИ и СДС плаќа дупло за една иста работа, на активен договор за реализирање на оваа работа од страна на една институција тоа е „Македонија пат“, друга државна институција Јавното претпријатие за државни патишта склучува нов договор со друга фирма вреден 2 милиони евра. Одговорот на овие прашања треба да биде предмет на истрага, која ЈО мора да ја отвори, а не да чека со денови ВМРО-ДПМНЕ и јавноста да алармираат, истакна Митева.
Неконтролираното трошење на народни пари преку тендери со преплаќање на услугите е првиот знак за корупција, и оттука очекуваме реакција и од ДКСК, но и од сите други институции кои имаат надлежност. Одговорност мора да има! Порачаа од ВМРО-ДПМНЕ.
