Габриел Атал (34) е именуван за премиер на Франција. Францускиот претседател Емануел Макрон денеска го избра својот близок соработник Атал за премиерската функција, кој отворено говори дека е геј.
Досега Атал беше министер за образование.
Шефот на државата вчера ја прифати оставката на премиерката Елизабет Борн, која беше на функција од мај 2022 година.
Овој потег нема да доведе до големи промени во политиката, но ја сигнализира желбата на Макрон да се обиде да ги надмине непопуларните пензиски и имиграциски реформи од минатата година и да ги подобри шансите на неговата центристичка партија на европските избори во јуни. Анкетите покажуваат дека партијата на Макрон заостанува меѓу осум и десет процентни поени зад партијата на десничарската Марин Ле Пен.Атал, близок советник на Макрон, кој стана познат низ цела Франција како владин портпарол за време на пандемијата „Ковид-19“, ќе ја замени Елизабет Борн, иако тоа сè уште не е официјално потврдено.
Тој е еден од најпопуларните политичари во последните анкети. Атал се стекна со репутација на способен министер со добри јавни настапи. Тој станува најмладиот француски премиер во историјата и првиот кој отворено е геј.
„Габриел Атал е малку како Макрон од 2017 година“, тврди парламентарецот Патрик Вињал, мислејќи на периодот кога Макрон стана најмладиот француски лидер во историјата, тогаш на бран на исклучителна популарност.
Вињал се сретнал со Атал, неговиот сопартиец, пред десет години и истакнува дека поранешниот министер за образование е „јасен и има авторитет“.
Заедно, Атал и Макрон се помлади од Џо Бајден, кој оваа година повторно се кандидира за американскиот претседател.
Францускиот претседател се занимава со потурбулентен парламент откако го загуби апсолутното мнозинство во тоа тело набргу по реизборот во 2022 година
