Претседателот на Владата на Република Македонија, Христијан Мицкоски во интервју во Топ тема на телевизија Телма изјави дека на следната владина седница ќе се формира ад хок тело во кое ќе се испитуваат како претходната влада поделила 100 милиони евра без критериуми за наводна поддршка на компаниите во време на ковид кризата.

Знаете ли колку пари се потрошени по основ поддршка на компаниите, онаа владина помош? Знаете ли колку пари се потрошени, зборувам за онаа инвестиција жестоко најавувана поддршка на македонското стопанство, закон се носеше итн. 100 милиони евра се потрошени. Но, дали некој знае за што се овие пари потрошени, бидејќи во законот секој може да конкурира, дури вели во законот и оние правни лица кои што не ги исполнуваат условите согласно овој закон. Дали некој знае и направил проверка зошто овие 100 милиони евра се потрошени, праша премиерот Мицкоски.

Премиерот Мицкоски најави дека во среда на владина седница ќе се формира ад хок тело кое ќе испита како се поделиле овие 100 милиони евра, нагласувајќи дека согласно законот и правилникот стоело обврска дека треба да има формирано тело кое ќе следи како и на што се трошеле овие средства.

Сега ќе формираме ад хок тело на оваа седница во среда која што ќе ја имаме, а согласно законот стои обврска да се формира тело кое што ќе следи како се трошат парите и за што се трошат. Но, никој не го формирал тоа тело, ниту пак го создал правилникот којшто согласно законот морале да го создадат, дециден е тој.

Мицкоски во вечерашното гостување во Топ Тема на ТВ Телма говорејќи за тоа како претходната влада неодговорно се однесувала со буџетот на граѓаните истакна дека државата треба да им исплати десетици милиони евра на вработените во МВР и МО кои од одредени министри кои лечеле лични фрустрации биле противправно преместувани од едно на друго работно место.

„Дваесет милиони евра треба да платиме оштета на вработените во Министерството за внатрешни работи затоа што некој дивеел и ги преместувал од едно на друго работно место незаконски. Петнаесет милиони во Министерството за одбрана“, истакна Мицкоски додавајќи дека со ваквите работи треба да се занимаваат истражните органи.

„Кој сум јас да се однесувам бахато па да лечам сопствена фрустрација да го оштетувам буџетот којшто го полнат граѓаните. Така се однесувале некои министри“, потенцираше Мицкоски и додаде:и

„Во буџетот недостасуваат 200 милиони евра. Со 200 милини евра, што се пари украдени, не само во здравството, ќе имавме повеќе пари и за образованието, ќе имавме повеќе пари и за други места, за секаде ќе имавме. Но тоа допрва ќе има одговорност за тие 200 милиони евра украдени коишто вака на прва до сега сме ги констатирале“.

Тој исто така додаде дека недостасувале и 5 милијарди денари за пензионерите.

„Ви кажувам дека фалеа половина милијарда денари за регуларна исплата на пензиите. Ние што направивме? Ние истиот волумен којшто беше предвиден согласно закон само го реструктуиравме за да биде фер. Да не биде процентуално зголемувањето на пензиите, туку линеарно и на тоа качивме плус мислам дека околу 180 милиони денари“, потенцираше Мицкоски.

Мицкоски истакна дека според договорот за Коридорот 8 и 10 Д во овој буџет во оваа година календарска биле резервирани 15 милијарди денари, а реализацијата ниту чуда да се случат не може да биде поголема од 6 милијарди затоа што претходната влада преземале обврски коишто не успеале да ги испорачаат и да обезбедат фронт на изведувачите со тоа што ќе ги решат имотно правните односи, односно експропријацијата која за делницата Ќафасан-Требеништа е преземена обврска дека ќе се речи до средината на 2023 година и не е решена ниту 1%, па за да не пропаднат тие пари, дел од нив ќе се искористат за да им се исплати на земјоделците и на вработените во Национални шуми тоа што претходната заборавила да предвиди како и за капитални проекти во општините.

„Ако ја оставиме оваа динамика вака како што е тие 9 милијарди денари ќе пропаднат, резервирани за овој проект. Затоа ние велиме 6 милијарди ќе инвестираме во капитални проекти во општините. Од останатите пари, на земјоделците им се должи 3 милијарди и 700. Ќе вратиме една милијарда и 700 на луѓето коишто ја хранат Македонија и коишто изведуваат да им вратиме една милијарда и 700. Не можеме сите 3 и 700, можеме милијарда и 700. Со идниот буџет којшто ние ќе го правиме до година ќе бидат уште 2 милијарди“, нагласи Мицкоски и додаде:

„На луѓето коишто се од Национални шуми им треба пола милијарда за да им бидат платени платите. Луѓето немаат 4 месеци плата земено“.