Поради невремето што ја зафати Србија се случија повеќе сообраќајни несреќи. Меѓу нив и македонски автобус се излизга и удри во банкина на автопатот кај Појате, јави дописникот на МИА од Белград.
– Состојбата на патниците не е позната, а причинета е поголема материјална штета, пишува порталот Телеграф, а Инстаграм страницата 192 рс. објави фотографија од несреќата со изјави од патниците дека на тој дел од автопатот Ниш-Белград, кај Појате се возело со 30 км на час.
Српското МВР не соопштува ништо за оваа сообраќајна несреќа.
Вчера се случи сообраќајна несреќа и на автопатот Ниш-Пирот кај тунелот Банчарево. Во судирот учествуваа камион и автомобил. Обилните врнежи од снег предизвикаа колапс и на автопатот Милош Велики. Состојбата на патиштата беше критична низ Србија поради снегот којшто не престануваше да врне.
