Заменик-министерот за внатрешни работи Астрит Исени денеска присуствуваше на настан во организација на заменик-претседателот на Владата Арбен Фетаи во соработка со УНХЦР и Мисијата на ОБСЕ во Скопје, на кој се одбележа успешното решавање на случаите без државјанство кои произлегоа од распадот на СФР Југославија.
Заменик-министерoт Исени во своето обраќање истакна дека државјанството е едно од основните човекови права и е правна основа за голем број други граѓански права и слободи, ја означува правната врска помеѓу лицето и државата, без оглед на начинот на стекнување и не го означува етничкото потекло на државјанинот и дека МВР со проактивен пристап посветено учествувало во решавањето на тој проблем.
-Согласно член 7 од Законот за изменување и дополнување на Законот за државјанството на Република Македонија со кој на олеснителен начин се овозможи на државјанин на друга република на поранешната СФРЈ и државјанин на поранешна СФРЈ кои до 8 септември 1991 година, односно до времето на прогласување на независноста на Република Македонија живееле на територијата на Република Македонија да се стекнат со државјанство. Членот 7 се применуваше од 30.07.2021 година до 08.09.2024 година и државјанство добиле 1148 лица државјани на поранешна СФРЈ од нив 300 лица биле со статус без државјанство. Во 2023 година донесен е Законот за изменување и дополнување на Законот за лична карта и Законот за изменување и дополнување на Законот за пријавување на живеалиштето и престојувалиштето на граѓаните со цел на ова категорија на граѓани кои ќе се стекнат со државјански статус да може на полесен начин да добијат личен документ, потенцира Исени.
Исени образложи дека МВР за сите 300 лица кои навремено имале покренато постапка за стекнување со државјанство на Република Македонија, а кои биле со статус на лица без државјанство и живееле на територија на Република Македонија донесе позитивни решенија за стекнување со државјанство и истите се државјани на Република Македонија. Посочил дека со регулирање на државјанскиот статус, истите ги уживаат сите права и обврски согласно позитивните законски прописи во Република Македонија.
Заменик-министерот Исени на крај посочи дека Министерството за внатрешни работи останува силен поддржувач на меѓународната заедница, посветен и одговорен партнер во глобалниот дијалог и силен и како таков-општо признаен генератор и столб на мир, стабилност и безбедност во балканскиот и европскиот регион и пошироко.
