Канцеларијата на израелскиот премиер Бенјамин Нетанјаху соопшти дека Израел е посветен на договорот за прекин на огнот со Хамас и ќе продолжи да го почитува и исполнува својот дел од планот, откако висок функционер во палестинската милитантна група изјави дека Хамас не може да се обврзе на разоружување.
-Хамас треба да ги ослободи сите заложници во првата фаза. Тоа не го стори. Хамас знае каде се телата на нашите заложници. Хамас треба да биде разоружан според овој договор. Без „ако“ и без „но“. Тие не го сторија тоа. Хамас мора да се придржува до планот од 20 точки. Времето им истекува, се вели во соопштението од канцеларијата на Нетанјаху.
Планот на американскиот претседател Доналд Трамп од 29 септември бара Хамас веднаш да ги врати сите заложници пред да се обврзе на разоружување и да ја предаде контролата врз Појасот Газа на технократски одбор надгледуван од меѓународно транзициско тело.
Нетанјаху го поддржа планот, велејќи дека тој ќе ги демонтира воените капацитети на Хамас, ќе го заврши неговото политичко владеење и ќе обезбеди Појасот Газа „никогаш повеќе да не претставува закана за Израел“.
Сепак, договорот за прекин на огнот потпишан во Шарм ел Шеик на 9 октомври од страна на израелскиот министер за стратешки прашања Рон Дермер, Хамас и медијаторите не го опфаќа разоружувањето на Хамас, ниту бара од групата да ги ослободи сите починати заложници пред Израел да ги ослободи палестинските затвореници, според „Тајмс оф Израел“.
Израелската војска синоќа соопшти дека Црвениот крст го презел ковчегот со телото на еден заложник во јужниот дел на Појасот Газа.
Во соопштението на „X“, ИДФ ја повика јавноста да „се однесува со чувствителност и да чека официјална идентификација, која прво ќе им биде соопштена на семејствата“. Војската, исто така, нагласи дека Хамас е должен да ги „врати сите починати заложници“ според договорот за прекин на огнот во Газа.
Предавањето следеше по претходната изјава на Хамас дека ќе го предаде телото на еден израелски заложник на Црвениот крст. Хамас ги врати телата на девет од 28-те заложници убиени во Газа оваа недела и ги ослободи сите 20 преживеани заложници.
