Комисиската расправа за буџетот веќе заврши, но течеше динамично, со многу аргументи и бројки на маса, што е и најважното. Владата настапува со јасна визија и со податоци кои покажуваат дека Буџетот за 2026 година е внимателно испланиран и стабилен. За разлика од тоа, опозицијата настапуваше главно со политички флоскули и со амандмани кои најчесто немаа финансиска покриеност или пак беа поднесени, без претходно да се провери дека се веќе испланирани средства за конкретното барање. Наместо конструктивна дебата за развој, гледавме обиди за блокада и сензационализам, за жал“.

Ова во изјава за КУРИР го посочува пратеничката на ВМРО-ДПМНЕ, Дафина Стојаноска.

Ја прашавме, според неа, што е најклучно во Буџетот за 2026,

– Најклучно е тоа што за првпат имаме Буџет кој истовремено: обезбедува раст на платите и пензиите, носи високи капитални инвестиции и го намалува дефицитот, како процент од БДП. Тоа е суштината на одговорна економска политика – да не трошите повеќе отколку што создавате, а притоа да не ги жртвувате граѓаните, истакна таа.

Стојаноска со став за проекцијата: раст 3,8% и дефицит 3,5%.

-Ова се реални и здрави проекции. Раст од 3,8% значи дека економијата не стои во место, туку се движи напред, а дефицит од 3,5% покажува дека Владата ја држи под контрола јавната потрошувачка. Најважно е што, за разлика од минатото, сега имаме: поголеми приходи, раст на инвестициите, а истовремено дефицитот паѓа. Тоа е суштината на фискалната консолидација – раст без финансиски авантуризам, рече пратеничката.

Буџетот ќе влијае врз растот на економијата.

– Буџетот директно го поттикнува растот преку: капитални инвестиции од околу 40 милијарди денари, силна поддршка за инфраструктурата, сериозни средства за образование, здравство, животна средина и инвестиции. Кога градите патишта, училишта, болници, студентски домови и енергетски капацитети – тоа автоматски влече нови работни места, нови фирми и нова економска активност, образложи таа.

Во изјава за КУРИР, Стојаноска потенцира дека во овој буџет за плати се издвојуваат 52,6 милијарди денари.

-За плати се издвојуваат 52,6 милијарди денари, што е: раст од 3,6 милијарди денари, односно 7,5% повеќе од 2025 година. Ова директно значи зголемување за: просветата, здравството, полицијата, администрацијата, јавните служби. Ова не е предизборна мерка, туку системско усогласување на платите со економскиот раст, рече таа.

Пратеничката ни одговори и што добиваат пензионерите од вака проектираниот буџет.

– За пензии во Буџетот за 2026 се предвидени: 116,8 милијарди денари, што е раст од над 10 милијарди денари, односно зголемување од 9,7%. Тоа значи редовно законско зголемување, сигурна исплата, стабилен пензиски систем, и конечно – пензии што растат заедно со економијата, а не заостануваат зад инфлацијата. Ова е директна грижа за најстарата популација, потенцираше Стојаноска.

Опозицијата „нападна“ со низа амандмани и обвинувања, па ја прашавме пратеничката за коментар на нивното однесување за време на комисиската расправа.

– За жал, опозицијата повторно избра улога на блокатор, а не на коректор. Наместо амандмани кои носат развој, гледавме празни напади, неточни интерпретации, политичка хистерија без финансиска логика. Најпарадоксално е што денес тие зборуваат за долг, а токму нивните мандати оставија стотици милиони евра заеми без ниту еден вистински капитален проект зад нив. Денес ние ги враќаме тие долгови, а притоа градиме патишта, болници, училишта и градинки – тоа е клучната разлика. Денес ние паметно и домаќинско инвестираме, притоа истовремено планирајќи ги и долговите, и тековните расходи. Ова е домаќинска Влада која го начека дуплото дно од претходните Влади, но која постепено и домаќински веќе испливува на површина. Граѓаните да се сигурни и смирени. Повеќе нема изигрување со нивните пари, порача Стојаноска.