Камерите поставени на улиците од системот „Безбеден град “ од денеска ќе регистрираат сообраќајни прекршоци во рамки на едномесечен пробен период, пред целосната примена на системот предвидена за почетокот на следниот месец.

Во тек на пробниот период возачите ќе добиваат предупредувања, без изрекување казни.

Според најавите, во почетниот период ќе се евидентираат сообраќајните прекршоци како што се: управување на возило со брзина поголема дозволената, минување на црвено светло, изминат рок на важност на сообраќајна дозвола и непрописно паркирани возила. Во следната фаза ќе се прошири видот на сообраќајните прекршоци што ќе ги регистрира електронскиот систем.

Како што најави министерот за внатрешни работи Панче Тошковски во интервју за МИА, проектот „Безбеден град“ ќе започне со примена на 1 јануари 2026 година, а граѓаните ќе имаат еден месец пробен период за информирање пред официјалниот старт.

За примена на системот во изминатиот период се работеше на пакет законски измени.

Системот ќе функционира во комуникација со граѓаните преку нивните мобилни телефони.

– Проектот има за цел да ја зголеми безбедноста во сообраќајот и да воспостави поефикасен систем на превенција и санкционирање преку дигитална комуникација со граѓаните изјави Тошковски.

Пробно тестирање на „Сејф сити“: Регистрирани се од 5.000 до 11.000 прекршоци на дневна основа

Ако од утре, хипотетички почне да работи системот „Сејф сити“, МВР би требало да казнува од 5 до 11 илјади возачи дневно, кои направиле сообраќајни прекршoци. Оваа фрапантна бројка е добиена од тестирањето на безбедносните камери низ Скопје и системот за казнување. Главно прекршоците се за брзо возење, поминување на црвено и неправилно паркирање. Од МВР апелираат – бројките се алармантни, а граѓаните мора да ја променат навиката за возење.

Во рамки на пробните тестирања на системот, на 31.07.2025 констатирани се 9900 санкции за возила кои се движат со брзина поголема од дозволената, при што има и возила кои се движат и со повеќе од 200 км на час. На истиот ден констатирани се и 80 прекршоци за минување на црвено светло, изјави Гоце Андреески, портпарол на МВР.

Во моментов со актуелниот начин на контрола на сообраќајниците полицијата успева да евидентира по околу 500 казни на ден. Но, сообраќајниот хаос не се случува само на улица – и тротоарите се претворени во слепа зона. Секојдневно се кршат правилата од велосипедисти и возрасни и деца на електрични тротинети.

Кога ќе биде сторен сообраќаен прекршок документиран со технички средства и уреди за снимање, односно известувањето на граѓаните за сторениот прекршок ќе биде по електронски пат со доставување на линк за преземање на записникот за сторен сообраќаен прекршок со прекршочен платен налог и фото запис со кој е документиран прекршокот, како и укажување во однос на начинот на доставата и последиците од неотворање на линкот, изјави Гоце Андреески, портпарол на МВР.

Со измените на законот, од наредната година казни ќе има за сите пешаци, велосипедисти, мотоциклисти или возачи на тротинет, кои ќе користат електронски уреди како слушалки, мобилен телефон или смарт часовник. Дозволено ќе биде да се носи само една слушалка на уво. Казните за прекршоци се предлага да бидат за пешаците 40 евра, а за возачите 50 евра.

Македонија и натаму е на врвот по број на жртви во сообраќајот – со 65 загинати на еден милион жители, далеку над европскиот просек. Очекувањата се дека по автоматизацијата, казнувањето ќе се намали за 90 проценти.