Министерот за локална самоуправа, Златко Перински, денеска големиот верски празник Св. Никола, патронот на град Штип, го помина во овој град, каде што присуствуваше на свечената литија и чинот на кршење на празничниот колач.

Чествувањето се одржа во присуство на Неговото Блаженство г.г. Стефан, Архиепископ Охридски и Македонски, како и градоначалникот на Општина Штип, Иван Јорданов, заедно со бројни верници и граѓани.

Во рамки на денешната агенда, министерот Перински присуствуваше и на седницата на Регионалниот совет на Источниот плански регион, каде што беа разгледани тековни и идни активности поврзани со надлежностите за имплементација на политиките за рамномерен регионален развој.

Во текот на посетата, министерот направи увид, на проектот EcoScape – „Трансформирање на урбани локации со зелени инфраструктури“, кој се реализира во рамки на Приоритет 1: Позелен пограничен регион од ИПА програмата за прекугранична соработка. Во рамки на овој приоритет се финансирани шест проекти со вкупна вредност од над 5,1 милион евра.

-Секој ваков проект и секоја инвестиција се важни за општините, затоа што значат конкретно подобрување на секојдневниот живот на граѓаните, односно повеќе зелени простори и поквалитетна урбана средина. Министерството за локална самоуправа, преку националното кофинансирање, останува посветен партнер на општините во реализацијата на вакви проекти. И секако ги повикувам општините да ги искористат сите ресурси и целата поддршка што им ја ставаме на располагање.“, изјави министерот Перински.

Градоначалникот Јорданов информираше дека Општина Штип во рамки на проектот EcoScape веќе работи на имплементација на инвестициски активности поврзани со зелена инфраструктура, уредување на зелени површини и воспоставување на три паркови – два урбани парка и еден мал парк. „Нашата тенденција е, општина Штип во наредниот период да стане пример на општина што води сметка за интеграција и координација на урбаното зелено, да промовираме усвојување на практични еколошки решенија во урбаните средини со зголемено зеленило.“, истакна Јорданов.

Во текот на денот се одржа и Првата прес-конференција на проектот „Интегриран развој на препознатлив културен и близок до природата туризам во Источен плански регион и регион Благоевград“, со што формално беше означен почетокот на уште една значајна прекугранична иницијатива.

Проектот се имплементира преку ИПА 3 програмата, во рамки на Приоритет 3: Интегриран развој на прекуграничниот регион, со вкупен буџет од 1.054.056,20 евра, и има за цел одржлив развој на туризмот преку поврзување на културното наследство и природните ресурси на двата региона.