Американски судија вчера изјави дека претседателот Доналд Трамп не може да ја изгради својата планирана балска сала од 400 милиони долари на местото на срушеното Источно крило на Белата куќа без одобрение од Конгресот, со што засега се запира обидот на републиканскиот претседател да му даде нов живот на седиштето на американската моќ.

Окружниот судија на САД, Ричард Леон, го одобри барањето за прелиминарна забрана од Националниот фонд за зачувување на историските добра. Непрофитната група поднесе тужба во која тврди дека Трамп ги пречекорил своите овластувања кога го срушил историското Источно крило и ја почнал изградбата на новата зграда.

Пресудата на судијата Леон, кој беше назначен од поранешниот републикански претседател Џорџ В. Буш, ќе го стави на чекање проектот за балска сала од 90.000 квадратни метри додека трае тужбата.

Во својата наредба Леон рече дека ниеден федерален закон ни оддалеку не му дава овластување на претседателот да го сруши Источното крило и да ја изгради балската сала со приватни средства.

„Претседателот на Соединетите Американски Држави е управител на Белата куќа за идните генерации први семејства. Сепак, тој не е сопственик!“, напиша Леон.

Министерството за правда поднесе жалба до Окружниот апелациски суд на САД за округот Колумбија во Вашингтон неколку часа по одлуката на судијата.

Во објава на неговата мрежа „Тру соушал“, Трамп ја нарече Националната фондација група левичарски „луди луѓе“ и рече дека неговата балска сала „чини помалку и се движи побргу од очекуваното, се гради без трошоци за даночните обврзници и ќе биде најдобрата зграда од ваков вид насекаде во светот“.

„Ова е победа за американскиот народ на проект што засекогаш ќе влијае на едно од најомилените и најзначајни места во нашата нација“, рече Керол Квилен, директорка на Фондацијата.

Трамп ја застапува балската сала како дефинирачки додаток на Белата куќа и траен симбол на неговото претседателствување.

Националната фондација ги тужеше Трамп и неколку федерални агенции во декември откога администрацијата го сруши Источното крило – првично изградено во 1902 година и проширено четири децении подоцна под Франклин Рузвелт – за да се направи место за балската сала на Трамп.

„Многу работи се изградени во Белата куќа“, рече Трамп. „Тие не се одобрени од Конгресот, особено кога парите не доаѓаат од даночните обврзници“, рече Трамп.

Судијата „тотално греши“, рече американскиот претседател.