ВМРО-ДПМНЕ денеска упати обвинувања кон претседателот на гранковиот синдикат УПОЗ и член на претседателството на ССМ, Трпе Деаноски, тврдејќи дека организирал четиридневни спортски игри во Чањ, Црна Гора, за кои биле потрошени околу 60.000 евра.
Од партијата наведуваат дека на настанот учествувале лица кои биле привилегирани при изборот, иако, како што велат, УПОЗ има повеќе од 3.000 членови. Според ВМРО-ДПМНЕ, предност при учеството добиле членови блиски до СДСМ.
„Привилегирани лица добиле можност да учествуваат на овие спортски игри, иако УПОЗ брои над 3.000 членови. Разочарани членови на синдикатот кажаа дека предност добиле лица кои се блиски до СДС“, се наведува во партиското соопштение.
Од ВМРО-ДПМНЕ го критикуваат и раководството на Сојузот на синдикатите на Македонија, оценувајќи дека се оддалечува од членството и дека не ги застапува доволно интересите на работниците.
Партијата тврди дека синдикатите треба да бидат насочени кон заштита на работничките права, а не кон активности кои, според нив, претставуваат непродуктивно трошење на средства обезбедени преку членарини.
