Иран им предложи на САД седумдневен план за повторно отворање на Ормуската Теснина, според кој Теснината би била отворена на седмиот ден доколку бидат исполнети одредени услови, изјави иранскиот министер за надворешни работи, Абас Арагчи.
Арагчи во изјава за новинарите на маргините на Генералното собрание на ОН во Њујорк рече дека по повторното отворање на Теснината би продолжиле и преговорите меѓу Иран и САД.
Тој не даде појаснување за поставените услови, но истакна дека тие „не се ништо повеќе“ од она што двете земји го договориле во јуни.
„Њујорк тајмс“ и „Си-Ен-Ен“ објавија дека иранскиот предлог бил доставен до САД преку посредник.
Претставник на Белата куќа за „Си-Ен-Ен“ изјави дека САД и Иран водат „позитивни и конструктивни разговори преку посредниците“.
Иранските државни медиуми објавија дека условите на Техеран за повторно отворање на Ормуската Теснина вклучуваат итно укинување на американската поморска блокада долж иранскиот брег, ослободување на сите замрзнати ирански средства и прекин на воените дејствија на сите фронтови.
Претставници на САД и Иран во вторникот разговараа на маргините на Генералното собрание на ОН, што беа први такви преговори меѓу двете страни по неколку месеци.
Контролата врз Ормуската Теснина, клучниот поморски пат за транспорт на нафта и течен природен гас, останува едно од централните спорни прашања меѓу Вашингтон и Техеран.
