Францускиот претседател Емануел Макрон свика кризен состанок за вечерва за да се разговара за најновиот бран немири среде сè помасовните протести поради условите во француските училишта, јавија локалните медиуми.
Премиерот Себастијан Лекорни, министерот за внатрешни работи Лоран Нуњез и министерот за образование Едуар Жефре се очекува да присуствуваат, јавија телевизијата БФМТВ и весниците Монд и Ле Паризиен.
Макрон досега се држеше настрана од одговорот на владата на училишните протести, кои почнаа пред една недела.
За време на националниот ден на протести во вторник, демонстрации се одржаа во Париз и бројни други големи градови. Според Министерството за внатрешни работи, учествувале 256.000 луѓе.
Само во Париз, се проценува дека 56.000 луѓе се приклучиле на протестниот марш. Синдикатите за образование ја проценија бројката на учесници на национално ниво на 450.000.
Синдикатите за првпат им се приклучија на протестите на учениците за подобро опремени училишта и подобрени услови за учење. Во нив учествуваа и наставници и родители.
Владата е загрижена дека ученичките протести, кои на моменти стануваат и насилни, би можеле да се прошират и во други делови од општеството, поттикнати од високите цени на горивата и растечките трошоци за живот. Движењето „Жолти елеци“, поттикнато од слични загрижености, ја држеше Франција во немир подолг период во 2019 година. MИА
