Францускиот претседател Емануел Макрон ќе ги прими средношколците и претставниците на средношколските организации денеска во 15 часот во Елисејската палата за да ги слушне нивните барања и загрижености по демонстрациите обележани со насилство, објави француското претседателство.
Ќе бидат присутни членови на главните студентски здруженија кои ја претставуваат различноста на нивните ставови и Академските совети за студентски живот (CAVL).
Студентските организации ќе одржат прес-конференција во близина на Елисејската палата по состанокот.
Во Франција, за утре, 24 октомври, се најавени нови протести, особено во Париз, но и во други поголеми градови како што се Марсеј, Лион, Ница, Бордо.
Бранот масовни протести во Франција започна кон средината на септември како локален штрајк и бунт на ученици и наставници во средно училиште во предградие на Париз, а причината беа лошите услови во образованието, хроничниот недостиг на наставници, преполните училници и запуштените училишни згради.
Протестите се проширија во средните училишта и факултети низ целата земја, а беа проследени со масовни блокади и судири со полицијата.
На демонстрациите им се придружија синдикати, родители и активисти на поранешното движење „Жолти елеци“, а на почетните барања за реформа во образованието им се придружија масовни улични протести против високите трошоци за живот, зголемувањето на цените на горивата и владините мерки за штедење.
