Седумнаесет од 22 главни американски федерални агенции не ги имплементирале целосно клучните упатства за кибер безбедноста, што го зголемува ризикот од нови такви напади и нарушувања на владините системи, предупреди денеска Канцеларијата за одговорност на владата на САД (GAO) во својот извештај.

Извештајот, меѓу другите, ги вклучува Министерството за внатрешна безбедност, Министерството за правда,Стејт департментот, Министерството за финансии и Министерството за здравство и човечки услуги.

GAO испита дали федералните институции вклучиле во своите планови избрани упатства за спроведување на таканаречената архитектура на нулта доверба (Zero Trust Architecture), модел на кибер безбедност во кој идентитетот и доверливоста на корисниците, уредите и системите мора да се потврдат пред пристап до заштитени мрежи.

Повеќето агенции имале развиено општи планови, но 17 од нив не ги вклучија целосно клучните технички и организациски упатства. Најчестите недостатоци се однесуваат на нецелосна идентификација на корисниците и софтверските апликации во ИТ средини, нејасно дефинирани одговорности за спроведување на плановите и недоволна документација. Службениците на агенцијата ги наведоа недостигот на персонал и буџетските ограничувања како главни пречки.

Меѓу 17-те агенции идентификувани како неуспешни се – за внатрешна безбедност (DHS), правда (DOJ), надворешни работи, финансии и здравство (HHS). GAO даде вкупно 40 препораки до тие агенции. Министерството за здравство и социјални услуги (HHS) доби најмногу препораки (шест).

МИА