Постојат сериозни индиции и сомнежи дека СДСМ подготвува масовен поткуп на гласачи за претстојниот референдум, само за некој глас повеќе за поддршка на капитулантскиот договор на Зоран Заев и Алексис Ципрас, информира на денешната прес-конференција портпаролот н ВМРО-ДПМНЕ, Димче Арсовски.

– Она што Заев го најави од Крива Паланка постојат индиции дека засилено го прават неговите локални пајташи на терен насекаде. Барањето на Заев да се исплаќаат пари за откажување од сопствениот идентитет освен во приватните компании, постојат сомнежи дека ќе се практикува и во државни институции. Кружат информации дека раководители ќе делат награди и бонуси само за граѓаните да се откажат од името. Целата операција чини поприлично и затоа гледаме секој ден нови задолжувања. Денес Министерството за финансии ќе  објави проспекти за ново задолжување од над 30 милиони евра. Ова е само едно во низата милионски задолжувања на оваа власт во период од само неколку месеци, рече Арсовски.

И додека милиони се земаат со високи камати, додаде тој, никој не знае каде и на што се трошат парите со кои што не задолжува СДСМ.

– Дека парите се трошат сомнително и завршуваат во нечии џебови говори и фактот што капиталните инвестиции се на историски најниско ниво до сега. Нивото на реализација е најниско за изминативе 20 години,  имено од почетокот  на годината заклучно со месец август реализацијата на капитални инвестиции е само 23.3 отсто. Ова е недозволиво и доказ само за едно, дека оваа власт не работи ништо и нема план за ништо и парите завршуваат во некои сомнителни дупки. Парите не се трошат за она за  што се предвидени. Дополнително најавата за ребаланс на Буџетот, фрла сомнеж дека власта ќе крати од капитални инвестиции и ќе префрла пари во сектори кои се помалку значајни. Целиот економски крах кој ни се случува е уште еден обид за притисок врз граѓаните да се чувствуваат беспомошни за да мора да гласаат за себе укинување со надеж дека барем за некои си 30 години Република Македонија ќе влезе во ЕУ. Ако е тоа стратегија тогаш е многу погрешна. Граѓаните треба да знаат дека решението на проблемот е во заминување на корумпираната и неспособна влада на Заев, а не во себеукинувањето, рече портпаролот.

На новинарско прашање „како ја коментирате изјавата на Николоски дека очекуваат се поголем број на граѓани, односно најавуваат дека ќе останат дома за референдумот и дека партијата го очекува тоа и Дали е тоа директен повик за бојкот“, Арсовски одговори:

– Се работи за класичен спин на одредени медиуми. Се работи за погрешна интерпретација. Како што знаете ВМРО-ДПМНЕ го објави својот став кој што помина низ сите партиски структури, Извршниот и Централниот комитет, а тоа е граѓаните да одлучат секој поединечно како ќе постапат на 30-ти септември на денот на гласањето бидејќи се работи за наднационално прашање и треба самите да одлучат. ВМРО-ДПМНЕ верува во честа, достоинството и разумот на граѓаните и веруваме дека она кое што ќе одлучат како да постапат ќе биде правилно, одговори Арсовски.