Темното чоколадо е лек и точка. Еден од најдобрите лекови што постојат е од 50 до 100 грама дневно темно чоколадо со 75 проценти или повеќе какао – вели д-р Симон Милс, британскиот експерт за фитотерапија (билна медицина), медицински билкар и автор во областа на природната медицина.

Симон Милс (Simon Mills) е познат британски хербалист и пионер во современата фитотерапија. Дипломирал медицински науки на Универзитетот во Кембриџ и работи како клинички хербалист во Ексетер, Англија, уште од 1977 година. Оттука, иако пред неговото име може да се најде титулата д-р, тој нема лиценца да работи како доктор, но е експерт во својата област. Тоа, заедно со податокот дека завршил медицински науки на Кембриџ, дава право да му се припише и оваа титула.

Експертите по фитотерапија препорачуваат секојдневно земање какао со висок процент за подобрување на циркулацијата, подобрување на расположението и долговечност.

Во време кога потрагата по природни методи за зачувување на здравјето е во постојан пораст, сè повеќе експерти го насочуваат вниманието кон производи што со векови се користат во традиционалната медицина, а денес ја добиваат и својата научна потврда.

Д-р Милс во разговор со познатиот претприемач и водител Стивен Бартлет испраќа јасна и недвосмислена порака за вредноста на чистото какао.

– Темното чоколадо е лек и точка. Еден од најдобрите лекови што постојат е од 50 до 100 грама темно чоколадо со најмалку 75 проценти какао – истакнува д-р Милс.

Брзи резултати за мозокот и циркулацијата

Ефектите внесување висококвалитетно какао не бараат долготраен период за да станат видливи. Според д-р Милс, науката веќе има цврсти докази за неговото брзо дејство врз организмот.

– Правеа студии, каде што им даваа какао на волонтери, и успеаја да покажат промени во протокот на крвта за неколку минути, а дефинитивно во рок од еден час по внесувањето. Тоа е добро за здравјето на мозокот, како и за кардиоваскуларното здравје – објаснува тој.

Овој брз ефект има директно позитивно влијание врз две клучни подрачја: Здравјето на мозокот: преку подобрена микроциркулација и подобро снабдување на мозочните ќелии со кислород. Кардиоваскуларниот систем: со релаксирање на крвните садови и подобрување на целокупниот крвоток.

Подигање на расположението и духовна традиција

Покрај чисто физиолошките придобивки, какаото содржи и природни стимулирачки состојки, кои влијаат слично како кафето нудејќи стабилен прилив на енергија и подобрување на расположението.

Водителот Стивен Бартлет го потврдува ова преку лично искуство од бизнисот на својата партнерка (Bali Breathwork), која сесиите со жени ги почнува со топла шолја чисто какао.

– Веднаш забележуваш како луѓето се менуваат откога ќе испијат топла шолја какао. Топло е и таа вели дека речиси им го отвора срцето. А претпоставувам дека тоа е поради циркулацијата – споделува Бартлет, а д-р Милс се согласува дека какаото има докажан ефект на подигање на расположението – причина повеќе зошто луѓето толку многу го сакаат.

Клучот е во квалитетот, а не во шеќерот

Соговорниците нагласуваат дека мора да се направи јасна разлика помеѓу вистинското темно чоколадо и индустриските производи. Бартлет предупредува дека „не зборуваме нужно за топло чоколадо што доаѓа од кесичка“, што д-р Милс дополнително го појаснува.

– Би сакале да биде што е можно потемно. Односно, со најмалку 75 проценти какао. И има малку повеќе вкус на лек, нели? Не е толку слатко? Но јас им велам на многу мои пациенти: земајте по 50 грама темно чоколадо дневно како лек – рече Милс.

Со ова д-р Милс уште еднаш го потврдува ставот дека квалитетното темно чоколадо не е само десерт, туку практична, вкусна и научно заснована терапија за секојдневна превенција. фф/дј/

Фото: МИА Архива/Pixabay/Unsplash/Принтскрин