Јас не го испратив дипломатот во Мисијата на ОБСЕ што беше приведен во Србија, објави синоќа вицепремиерот за европски прашања Никола Димитров, на својот фејсбук профил.

Жешкиот дипломатски костен Димитров го префрла во други раце.

– За разјаснување на дипломатскиот скандал и во интерес на точно информирање на јавноста, укажувам на следниве факти и информации за односниот дипломат. Тој бил испратен во Мисијата на ОБСЕ во Виена во 2015 година, кога со МНР раководи друг министер. Неговото барање за продолжување на мандатот е одбиено од моја страна, тврди Димитров.

Во 2019 година, како што пишува Димитров, во МНР биле добиени првите индиции дека ќе се води истрага за постапки на односните вработени, меѓу кои и за овој дипломат. Но, посочува, во тоа време немаше никаква информација за потерница и секако немаше пресуда.

– Сепак, МНР имајќи ја предвид истрагата и токму врз основа на овие индиции, не дозволи овие лица да бидат упатени на служба во странство. МНР за најавената истрага написмено ги информираше безбедносните служби, кои меѓу другото се надлежни и за безбедносни сертификати и проверки, пишува Димитров.

Согласно Законот, додава Димитров, на дипломати во МНР не може да им биде поништена дипломатска патна исправа, освен при одземање на безбедносен сертификат што е во надлежност на друга институција, односно престанок на работниот однос.

– Потерницата од Интерпол е распишана во февруари 2020 година, долг период по враќањето на дипломатот од Виена и за тоа не е доставена информација до МНР во времето додека бев таму на должност. Како и зошто сега бил упатен на служба токму тој дипломат и тоа во Мисијата при ОБСЕ, немам информации, пишува Димитров на Фејсбук.

Од изнесениве факти, нагласува тој, јасно се гледа дека за време на мојата должност во МНР, службите постапиле законски и во рамки на своите надлежности.

– Меѓу другото, токму јас го имам искористено дискреционото право да не го испратам овој дипломат на служба, имајќи ја предвид неизвесноста околу истрагата, пишува вицепремиерот Димитров.

Како што веќе објавивме, пред неколку дена, на гранчниот премин меѓу Србија и Македонија, уапсен беше македонскиот дипломат Миле Миленковски, по меѓународна потерница распишана од Ерменија. Вчера и актуелниот министер за надворешни работи, Бујар Османи, изјави дека тој не чувствува одговорност за овој случај.