Нема промени во здравствената состојба на британскиот премиер Борис Џонсон, изјавија двајца извори, блиски до шефот на британската Влада, откако синоќа тој беше преместен на Одделот за интензивна нега во болницата „Свети Томас“ по влошувањето на симптомите од коронавирусот.

„Даунингстрит“ 10 информира дека Џонсон добил кислород, а бил хоспитализиран како мерка на претпазливост по влошувањето на неговата здравствена состојба, јави Би Би Си.

Но, според „Гардијан“ текот на настаните бил „чуден“, па дури и прашува дали се забошотувала вистината откако „Даунинг стрит“ упорно негираше дека е влошена состојбата на прмеиерот.

Весникот посочува, дека според неговите соработници, на Џонсон му се влошила состојбата уште во четвртокот изутрина, кога неименуван извор рекол дека за премиерот е подготвен кревет во „Свети Томас“. Дел од членовите на Конзервативната партија уште тогаш чуле гласини дека Џонсон е хоспитализиран. Но, на прашањето од Гардијан, соработниците на Џонсон негирале дека му е влошено здравјето. Но, британскиот весник посочува дека откако синоќа Џонсон бил преместен на Интензивна нега, негирањата се ставени под знак прашалник.

Џонсон (55) една седмица откако се утврди дека е позитивен на коронавирус мина во изолација во станот во Даунинг стрит, додека неговата бремена свршеничка Кери Сајмондс, која исто не се чувствувала добро, била се повеќе загрижена за него. Од друга страна, Џонсон се обидувал по пат на видео врски и електронски пораки да раководи со ситуацијата, но постојано кашлал и состојбата не му се подобрувала.

Во четврток навече, Даунинг стрит соопшти дека Џонсон в петок нема да се врати на работа, како што се очекуваше, доколку и натаму има зголемена телесна температура.

Таа вечер, Џонсон излезе пред врата за да им апаудира на здравствените работници, но гласините не запреа. Сепак, здравствената состојба на британскиот премиер не се подобрил, па во сабота навечер е итно пренесен во болница. Само 90 минути подоцна, Даунинг стрит соопшти дека Џонсон е примен во болница поради одредени тестови, по совет на лекарите. Вчера, околу 20.30 часот е соопштено дека Џонсон е примен на одделот за интензивна нега.

Изворите кои информираа дека Џонсон примил кислород не беа демантирани, но Даунинг стрит ги негираше тврдењата на руските медиуми дека тој е приклучен на респиратор, оценувајќи ги како дезинформации.

Синоќа, британскиот министер за надворешни работи Доминик Раб, кој привремено ќе ги извршува обврсските на Џонсон, повтори дека премиерот добро ја минал ноќта и е добро расположен, но Гардијан оценува дека поради ненавремените и нецелосни информации може јавноста да ја изгуби довербата во властите.

Раб синоќа потенцираше дека британската Влада ќе продолжи да ги спроведува плановите на Џонсон со цел да се победи епидемијата на коронавирусот. Велика Британија нема формален план за тоа кој го менува премиерот доколку тој не е во состојба да ги извршува обврските, но Даунинг стрит најави дека Раб ќе ги води владините седници, како и другите активности за кои бил одговорен премиерот.

– Работата на Владата ќе продолжи. Премиерот е во сигурни раце…а фокусот на Владата и натаму ќе биде да се спроведат насоките на премиерот Џонсон, да се спроведат сите планови усвоени за борба против коронавирусот и минување на државата низ ова искушение, изјави синоќа Раб.

Евроскептик, носител на црн појас во карате трети дан и аматерски боксер, 46-годишниот Раб се смета за „лојален и дисциплиниран“. – Тој е цврст и остроумен. Не е личност која лесно може да биде застрашена, изјави неговиот поранешен шеф, екс британскиот министер за Брегзит Дејвид Дејвис.

Во меѓувреме, светските челници изразуваат желби за што побрзо закпренување на Џонсон.

– Испраќам најтопли поздрави за добриот пријател, пријател на нашата нација, премиерот Борис Џонсон. Многу сме тажни што е преместен на интензивна нега. Сите Американци се молат за него. Тој е силен и одлучен и не се предава, изјави американскиот претседател Доналд Трамп.

– Ја испраќам сета своја поддршка за Борис Џонсон, неговото семејство и британскиот народ во овој тежок момент. Му посакувам брзо да го преброди ова тешко искушение, порача францускиот претседател Емануел Макрон.

Слична порака упати и претседателката на Европската комисија Урсула фон дер Лајен.

“Моја солидарност и желби за брзо опоравување на прмеиерот Џонсон. Ова се тешки денови за нашите земји, но со сила и единство – ќе победиме“, напиша шпанскиот премиер Педро Санчез.

„Италијанците се со Британците во овој тежок период. Сите за еден. Оздрави брзо Борисе!“, напиша на Твитер италијанскиот министер за надворешни работи Луиџи ди Мајо.