Турскиот претседател Реџеп Таип Ердоган потпиша закон со кој се воведува условно помилување за илјадници членови на милитантната Работничка партија на Курдистан (ПКК), како дел од мировниот процес меѓу турската држава и милитантите.
Мерката беше објавена денеска во турскиот Службен весник и ќе стапи на сила дури откако турскиот Национален совет за безбедност ќе потврди дека ПКК е целосно распуштена и разоружана.
Парламентот го усвои законот со огромно мнозинство минатата недела.
Со него се суспендираат одредени затворски казни за осудени членови на ПКК и се одложуваат тековните истраги и судења за пет или 10 години, во зависност од сериозноста на кривичното дело.
Властите ќе ги прекинат постапките против поединци доколку не повторат кривични дела во предвидениот рок.
Законот воспоставува комитет за надгледување на разоружувањето на групата, а неговиот прв состанок се очекува следната недела.
МИА
