Договорот за промена на името кој Заев и Димитров го потпишаа со Грција е штетен и капитулантски. Според членот 1 од договорот, името ќе биде обврзувачко и неотповикливо. Заев ја запечатува судбината на државата и го менува името трајно. Заев трајно го понижува целиот македонски народ-изјави на денешната прес конференција членот на ИК на ВМРО-ДПМНЕ, Орце Ѓорѓиевски.

Ѓорѓиевски истакна дека со овој договор Република Македонија доброволно се откажува од привремената спогодба помеѓу Република Македонија и Грција, од 13 септември 1995 година и од пресудата на меѓународниот суд во Хаг од 2011 година, пресуда која нотира дека Македонија е во право, а Грција не е во право и истовремено наложува на Грција дека не смее да ја блокира Македонија за членство во ЕУ и НАТО. Тој рече и дека Заев и Димитров само со еден потпис ја укинаа одлуката на судот на Обединетите Нации во Хаг и се ставија над меѓународното право кое беше на страната на Република Македонија и истото го погазуваат.

-Заев лаже кога вели дека Република Македонија ништо не губи со овој договор. Со потпишувањето на овој договор директно се задира во идентитетот и јазикот на нашиот народ, директно се менува Уставот и секаде ние ќе бидеме Северна  Македонија. Заев лаже дека нема да има промена на кодовите. Согласно овој договор за промена на името кој што го потпишаа Заев и Димитров кодовите се менуваат и наместо МК и МКД ќе биде НМ и НМК, рече Ѓеорѓиевски.

Тој истакна дека ваквата капитулација не е и не може да биде покритие за криминалниот картел на власта. Ваквиот штетен договор не може да биде покритие за барањето поткуп кое што впрочем го видоа сите граѓани на Република Македонија и амнестијата која што истовремено сам си ја обезбеди Зоран Заев. Затоа Македонија не ги отпочна преговорите за членство со Европската Унија туку се бараат дополнителни услови и исполнување на реформи кои оваа неспособна и расипничка власт очигледно не умее да ги изведе, изјави Ѓеорѓиевки.

-Република Македонија е оштетена страна со овој договор, а целиот наш македонски народ е губитник. Ова понижување не смее да продолжи. Зоран Заев и СДСМ мора час поскоро да си заминат од македонската политичка сцена. Република Македонија мора да тргне напред, рече тој.