Ниеден политичар нема мандат да преговара за идентитетот на еден народ, порача претседателот на Република Македонија, Ѓорге Иванов, за време на посетата на Македонската православна црква „Рождество на Пресвета Богородица“ во Детроит во САД.

– Мнозинството македонски граѓани не гласале за програма во која е предвидена промена на Уставот на Република Македонија заради промена на уставното име на државата. Па така, ниту актуелната Влада не добила мандат од народот, ниту од гласачите, за промена на идентитетот, за откажување од дијаспората, за губење на историјата и паметењето, порача претседателот Иванов.

Република Македонија, рече Иванов, е трајна придобивка, но со спогодбата со Грција и претстојниот референдум, таа трајна придобивка сега се релативизира.

– Како да не се сфаќа дека со релативизирање на трајното, ние се релативизираме и како народ. Со оваа спогодба се обидуваат да не понижат, како што ниту еден народ никогаш не бил понижен. Сакаат да не направат недоветни сметајќи дека не знаеме како се викаме, рече претседателот Иванов.

Тој, како што информираат од неговиот кабинет, го повтори својот став дека нема да гласа на референдумот на 30 септември.

– Преродбениците се бореа за слобода од духовното ропство. Револуционерите се бореа за слобода од политичкото ропство. Зарем сега ние, по сите тие жртви ќе влегуваме во ново ропство? Зарем ќе се одрекуваме од слободата да се наречеме според нашето сопствено име. Зарем ќе се стеснуваме да кажеме дека постои Република Македонија, плашејќи се ако спомнеме Република Македонија да не навредиме некој. Да се каже Република Македонија не е ни срам ни страв, рече претседателот Иванов.

Македонскиот претседател присуствуваше на литургија и осветување на фрескоживописот во црквата, и ги посети децата од македонско потекло што изучуваат веронаука.

– Кога пишувате, зборувате и творите на македонски јазик, вие активно учествувате во изградбата на нашата идеална татковина. Македонија е татковина на старословенскиот црковен јазик. Наш долг како Македонци е да го чуваме и постојано да го унапредуваме нашиот македонски јазик. Затоа, мој апел до вас денеска е да не го оставите и заборавите македонскиот јазик. Да ги учите вашите деца, да ги поттикнувате вашите блиски, да бидете пример и охрабрување за Македонците во дијаспората, но и во Република Македонија, рече претседателот Иванов пред претставниците на црковната заедница во Детроит.

Претседателот Иванов ја посети и македонската заедница во Њу Џерси:

– Од нас зависи дали ќе ја сочуваме одлуката од првиот референдум за Република Македонија во која ќе бидеме свои на своето или правно ќе се укинеме како народ и ќе дозволиме некој друг да ни го толкува минатото и да ни ја одзема иднината, порача претседателот Иванов во Њу Џерси.

Тој, како што соопшти неговиот кабинет, смета дека конечната одговорност е на македонските граѓани, бидејќи, како што вели, каква Македонија ќе изградиме, таква ќе ја имаме.

– Од нас зависи дали ќе ја сочуваме одлуката од првиот референдум за Република Македонија во која ќе бидеме свои на своето, во која нема да се воздржуваме да кажеме дека сме Македонци, дека нашите предци биле Македонци. Или, ќе се одлучи да се поништи одлуката од претходниот референдум од 8 септември 1991 година. Дали правно ќе се укинеме како народ и ќе дозволиме некој друг да ни го толкува минатото и да ни ја одзема иднината, рече претседателот Иванов, кој во Сидер Гроув, Њу Џерси, ја посети Македонската православна црква „Св. Кирил и Методиј“.

Претседателот Иванов од денеска во Њујорк го започнува учеството на 73. Генерално Собрание на Обединетите Нации. Предвидено е претседателот Иванов да се обрати пред Генералното Собрание на ОН на 27 септември.