Европската унија направи голема грешка со одложувањето на одлуката за почеток на преговори за членство со Македонија и Албанија за октомври, изјави потпретседателката на Бугарија Илијана Јотова за БНТ.
– С. Македонија и Албанија останаа разочарани. Убедена сум дека Европа, Европската унија не може да претендира да биде светски лидер, да интервенира и превенира различни конфликти, не може да седне како рамноправен партнер на масата со големите ако не обезбеди Западен Балкан еден ден да биде дел од политичкото проширување на ЕУ, бидејќи ако предлогот останат во предворјето, граѓаните ќе бидат обесхрабрени, потенцира Јотова.
Таа мисли дека ЕУ направила грешка.
– Мислам дека ЕУ направи голема грешка што ја одложи одлуката за октомври, истакна утрово бугарската потпретседателка. Се надевам дека во ЕУ во октомври ќе бидат помудри, бидејќи ние сите знаеме дека од јуни до октомври нема многу време за да се зборува за, не знам какво, исполнување на критериуми, посочи Јотова.
Таа потенцира дека Македонија даде голем залог за да добие датум за преговори, дека премиерот Зоран Заев дал многу ветувања пред граѓаните, но и дека европските лидери дале многу ветувања до Заев и до целата земја.
Јотова уште потенцираше дека Бугарија е најголем лобист за влез на Западен Балкан во ЕУ.
