Минималната плата порасна, усогласувањето за администрацијата неизвесно, велат од Конфедерацијата на слободни синдикати, објави ТВ Сител.
На една недела пред распуштање на Собранието, во вторник е ставен на гласање пакетот за административните службеници. Меѓу четирите е и законот, со кој минималната плата ќе се тргне од пресметката, па илјадници вработени нема да добијат покачување од 2.300 денари, тврди КСС.
Синдикатот ги повикаа пратениците да не гласаат оти законите се штетни и предложени од Азир Алиу кој повеќе не е министер.
– Предлагачот на законот за административни службеници веќе не е член на Владата и ако продолжат да го туркаат како таков со нелегитимен предлагач мислам дека ќе направат кривично дело како што прават многупати низ годините и носат многу закони без да имаат заклучок на социо-економскиот совет, без да влезат во Владата, вели Благоја Ралповски, претседател на КСС
Ралповски изнесе и детали од социо-економскиот совет одржан вчера. Кажа дека претставниците од финансии и економија, како и вицепремиерот Фатмир Битиќи, биле против усогласувањето.
– Побаравме да се даде препорака на Владата да се почитува членот 8 и да се направи усогласување во рок од 6 месеци како што пропишува законот и предлогот беше ставен на гласање. Министерот за труд и социјала гласаше за, но заменик министерот за економија, заменик министерот за финансии и вицепремиерот гласаа против, вели Ралповски.
Околу 27.000 работници од април ќе имаат покачена минимална плата во износ од 22.500 денари. Синдикатите вчера побараа во првите 100 дена од новата Влада пак да има зголемување оти трошоците растат побрзо од платите.
Извор: ТВ Сител
