Избори ќе има, терминот е неизвесен, а партиските лидери за нивното одржување ќе решаваат на лидерската средба што ќе се одржи во вторник кај претседателот Стево Пендаровски.
Одлуката за датумот на изборите ќе треба да се донесе врз основа на стручните анализи на Комисијата за заразни болести.
Премиерот Оливер Спасовски, вчера соопшти дека одлуката за изборите пред се ќе се базира на интересите на државата и на граѓаните притоа оставајќи ги на страна сите политички интереси што ги имаат и ќе биде детерминирана од развојот на здравствената криза. Тој очекува на лидерската средба да се постигне договор во однос на одржувањето на изборите.
Според Спасовски, изборите е неопходно да се одржат што е можно поскоро.
– Не знам дали е идеално време јуни за да се одржат парламентарните избори, но заради најавите дека е можно да се врати оваа криза уште еднаш после септември, мислам дека е неопходно да се одржат што е можно побрзо, имајќи предвид дека на државата и се потребни функционални институции што ќе можат да носат одлуки за сите прашања кои се во интерес на граѓаните, посочи Спасовски.
Министерот за здравство Венко Филипче, пак, вели дека во однос на изборите ќе останат внимателни за тоа што ќе препорачаат здравствените експерти следната недела. Препораката ќе се темели врз основа на бројките на пациентите и анализа на случаите.
За лидерот на СДСМ Зоран Заев нема да има посоодветен период за избори од јуни годинава. Сепак, услов е кризата со коронавирусот да биде целосно одмината. Изборите, според него, треба да се одржат поскоро и поради фактот што немаме Парламент, и имаме техничка, а не политичка Влада.
ВМРО-ДПМНЕ, пак, останува на ставот дека во моментот изборите не се прв приоритет на партијата. Најважно е здравјето на граѓаните. Лидерот на партијата Христијан Мицкоски рече дека ќе излезат со коментар по самата лидерска средба откако ќе ги воочат проценките на Советот за безбедност и каков ќе биде ставот на претседателот Стево Пендаровски.
На лидерската средба кај шефот на државата во вторник поканети се лидерите на СДСМ, на ВМРО-ДПМНЕ, на ДУИ, на ДПА, на БЕСА и на Алијансата на Албанците. Поканет е и претседателот на Собранието, Талат Џафери, кој смета дека по завршувањето на вонредната состојба, ДИК веднаш треба да почне со подготовка на изборите.
