Името на синот на лидерот на ДУИ, Али Ахмети, е запишано како управител на новорегистрирана фирма за производство на електрична енергија во кичевски Зајас, објавува Фактор.
Шкумбин Ахмети од Зајас е одговорното лице на Друштвото за производство, трговија и услуги „Тхеас Енергу ДООЕЛ“. Сопственик на претпријатието кое извршило упис во изминатите денови е друштвото за консалтинг, посредување, проектирање, инжинеринг и услуги „Архитектас Пројоект Студио“ од Зајас.
За синот на Али Ахмети практично нема никакви информации во јавноста, ниту во медиумите на албански јазик. Единствено е познато дека е архитект кој дипломирал на тетовскиот универзитет и дека не покажал никаков интерес за политика. Исто така, познато е и дека Али Ахмети го крие семејниот живот подалеку од јавноста.
Ланското лето ДУИ објави дека се ребрендира во зелена партија која ќе се грижи за чистата животна средина, во која меѓудругото, приоритет ќе им се даде на обновливите извори на енергија.
Претходно опозицијата го обвини Ахмети дека во орманот за струја има диво приклучен кабел за електрична енергија, што беше демантирано од ДУИ.
Изминатите денови операторот за пренос на електрична енергија МЕПСО објави дека во изминатиот период добил барања од инвеститори за изградба на фотоцентрали и ветерници со капацитет од неверојатни 8.000 мегавати.
Како што веќе е објавено, прв од синовите на политичарите бизнис со струјата почна Душко Заев, син на бившиот премиер Зоран Заев, како и неговата кумашинка. Во бизнисот со струја е и сопругата на актуелниот премиер Димитар Ковачевски и еве сега синот на Али Ахмети.
