По парламентарните избори одржани вчера, Германија ја чека долг пат до формирање нова влада, најверојатно од тричлена коалиција.
Големата коалиција, која повторно би се состоела од ЦДУ/ЦСУ и СПД, според анкетите, е влада поддржана од само осум проценти од Германците. Меѓутоа, поради кризата, се уште е можна таа варијанта, но ЦДУ постојано нагласува дека никогаш не сака да биде помал партнер на СПД.
По изборите и СПД и ЦДУ/ЦСУ најавија дека планираат да формираат влада.
-Мора да се направи сѐ за да завршиме пред Божик, изјави шпиценкандидатот на СПД, Олаф Шолц, на дебата со останатите партиски лидери по изборите во Германија. Тој додаде дека би било добро доколку со преговори се заврши малку порано од тоа.
Со оглед на тоа што СПД, според сегашните резултати, е победник на изборите, може да формира влада со Зелените и ФДП.
Таква коалиција наречена „семафор“ е нешто што Зелените би го поддржале, но не е сигурно дали ФДП би влегла во таква влада. Имено, ФДП е партија која доби големи донации од индустријалци, а тоа би било во судир со Зелените, пред се.
Можна е и коалиција позната како „Јамајка“, со која би се избегнал канцелар од редовите на СПД.
На последните парламентарни избори во 2017 година, таквата коалиција, која ја сочинувале ЦДУ/ЦСУ, Зелените и ФДП, пропаднала откако шефот на либералите се повлече од коалициските преговори.
По овие избори, ФДП сигнализираше подготвеност за таква соработка, и овојпат Зелените може да бидат одлучувачки фактор.
Во секој случај, Зелените и ФДП ќе играат важна улога, без која СПД и ЦДУ/ЦСУ нема да можат да формираат нова влада во Берлин.
