Традицијата на симболично веслање стана еден од највиралните начини на прослава на ова Светско првенство, а сега ѝ се приклучи и норвешкиот парламент.
Норвешка живее во знакот на фудбалската еуфорија. По враќањето на Мундијалот по речиси три децении и убедливата победа од 4:1 над Ирак на стартот од турнирот, националниот тим доби необична поддршка од едно од најважните места во земјата – Парламентот.
За време на седница во Осло, голем дел од присутните пратеници учествуваа во симболичен гест со кој го имитираа движењето на веслање. Станува збор за традиција поврзана со норвешките навивачи и со викиншкото наследство на земјата.
Целта на иницијативата беше да се испрати порака на поддршка до репрезентацијата која настапува на Светското првенство 2026.
„Раководството на парламентот смета дека треба да испратиме поздрав до нашите фудбалери, репрезентација која навистина игра со срце. А нема подобар начин тоа да го направиме отколку со веслање“, изјави Масуд Гараххани, претседател на норвешкиот парламент.
Гест кој предизвика и критики
Симболичната акција траеше само неколку секунди и беше поддржана од мнозинството присутни пратеници.
Сепак, не сите беа воодушевени од идејата.
Ерленд Виборг, пратеник од Партијата на прогресот, која е втора по големина парламентарна сила во земјата, одби да учествува во акцијата.
Тој оцени дека поддршката за репрезентацијата може да се покаже и на други начини.
„Репрезентацијата може да се бодри од трибините, од локалниот бар или од каучот во сопствениот дом“, изјави Виборг објаснувајќи ја својата одлука.
И покрај изолираните критики, иницијативата уште еднаш покажа колкаво внимание предизвикува настапот на Норвешка на Светското првенство.
Сон што го живее цела Норвешка
Пласманот на Норвешка на Мундијалот предизвика огромен ентузијазам кај навивачите, спортските работници и државните институции.
Скандинавската селекција се врати на големото фудбалско натпреварување по долги 28 години и сонува за историски успех.
Убедливата победа над Ирак дополнително ја зголеми вербата дека Норвежаните можат да бидат едно од најпријатните изненадувања на турнирот.
Репрезентацијата предводена од ѕвезди како Ерлинг Халанд има амбиција да оди далеку на Мундијалот.
Поддршката не доаѓа само од политичарите. На првиот натпревар присуствуваше и норвешкиот премиер Јонас Гар Стере, а за следниот дуел против Сенегал во Њу Џерси ќе пристигнат и принцезата Ингрид Александра и нејзиниот помлад брат, принцот Свере Магнус, потврди Кралската палата.
Така, приказната околу норвешката репрезентација одамна ги надмина границите на фудбалот и се претвори во национална еуфорија, додека целата земја сонува за историски настап на Светското првенство во САД, Мексико и Канада.
