Министерството за одбрана соопшти дека е обезбеден и втор комплет 7.000 нови борбени униформи за припадниците на Армијата на Македонија, а Баталјонот за специјални сили добива нови 700 комплети на борбени униформи, специјално дизајнирани според нивните побарувања.
-Пред само неколку години, еден од најспоменуваните проблеми во Армијата беше недостигот на чизми и униформи за нејзините припадници. Покажавме дека со политичка волја и работа можат да се решат тие проблеми. Но, не застанавме тука. Го решивме проблемот, но воспоставивме и систем на снабдување кој треба да гарантира дека таквите проблеми никогаш нема да се повторат. Затоа, беше воведено правило на целосна покриеност на припадниците на Армијата со два комплета борбена униформа, и тоа правило целосно го реализиравме, стои во соопштението на Министерството за одбрана.
Новите униформи вчера пристигнале во касарната „Ѓорче Петров“ во Скопје. Со ова целосно се завршува опремувањето на Армијата со нови борбени униформи, наведуваат од Министерството за одбрана.
– Пристигнаа нови 7.000 борбени униформи за припадниците на Армијата и нови 700 комплети униформи за специјалните сили. Секој војник добива втор комплет нова борбена униформа. Кога ги набавивме првите комплети, рековме дека припадниците на Армијата ќе имаат и резервни униформи, и никогаш повеќе нема да останат со застарена опрема. Зборот е збор!- објави министерката за одбрана Радмила Шекеринска на нејзиниот официјален профил на Фејсбук.
