На ЕУ и е потребна нова стратегија во војната во Украина бидејќи санкциите против Москва не функционираат, изјави унгарскиот премиер Виктор Орбан.
„Потребна е нова стратегија која треба да се фокусира на мировните разговори и да даде добар мировен предлог наместо да победи во војна“, рече Орбан во говорот во Романија на 23 јули.
Орбан повтори дека Унгарија ќе остане надвор од војната во соседна Украина.
Тој претходно тврдеше дека Унгарија не е подготвена да ги поддржи санкциите или да го ограничи увозот на руски гас, бидејќи тоа ќе ја ослабне нејзината економија.
Во својот говор рече дека западната стратегија е изградена на четири столба: првиот е дека Украина може да победи во војната против Русија со оружје на НАТО, дека санкциите ќе ја ослабат Русија и ќе го дестабилизираат нејзиното раководство, дека санкциите ќе и наштетат на Русија повеќе отколку на Европа и дека светот ќе застане во поддршка на Европа.
Орбан рече дека стратегијата не успеа бидејќи владите во Европа паѓаат „како домино“, цените на енергијата експлодираа и сега е потребна нова стратегија.
„Седиме во автомобил во кој се дупнати сите четири гуми; апсолутно е јасно дека војната не може да се добие на овој начин“, им рече Орбан на своите поддржувачи.
Тој рече дека Украина никогаш нема да победи во војна на овој начин „од едноставна причина што руската армија има асиметрична доминација“.
