Белата куќа ќе се обиде да ја претстави помошта од Вашингтон за Киев како економски бум и отворање нови американски работни места, пишува бриселскиот портал Политико, кој се повикува на неименувани функционери и пратеници од САД.
-Ова дополнително барање инвестира над 50 милијарди долари во американската одбранбена индустриска база, обезбедувајќи дека нашата војска ќе продолжи да биде најподготвената, способна и најдобро опремена борбена сила што светот ја видел, и проширување на производните линии, зајакнување на американската економија и создавање нови Американски работни места, се наведува во документ до кој имал увид Политико.
Со други зборови, претставниците во Конгресот ќе треба да бидат убедени дека ова ќе биде економски поволно за тн. воено-индустриски комплекс на САД. Администрацијата на Бајден ќе проба да се повика на патриотизмот и на дополнителни средства.
Минатиот петок, администрацијата на Бајден побара од Конгресот нов пакет трошоци во вкупна вредност од 105 милијарди долари, наменет за покривање на безбедносните потреби на Украина, Израел и Тајван, како и за решавање на тензичната ситуација на јужната граница на Америка.
Претставник на Републиканците од САД во интервју за Политико сугерираше дека администрацијата „сфатила дека нивните пораки кон Украина конкретно биле катастрофа… и дека треба да се променат“.
Минатата недела Бајден го спореди украинскиот конфликт со Втората светска војна, тврдејќи дека „патриотските американски работници го градат арсеналот на демократијата и служат на каузата на слободата“.
