Од Управата за извршување на санкциите денеска извршиле вонреден надзор во затворот во Струга, откако вчера осуденикот Сашо Мијалков не беше спроведен во Кривичниот суд, на закажано рочиште за случајот Титаник 2.
Управата бутврдила дека нема пропуст кај управата на затворот, и констатирале дека станува збор за грешка која ја направил судот.
-Во текот на надзорот се утврди дека од Основниот кривичен суд Скопје на ден 14.12.2022 година во КПД Струга е добиено барање заведено под V КОК.бр.7/20 со датум од 23.11.2022 година со кое судот побарал обвинетиот во предметот С.М да биде спроведен на расправа на ден 12.12.2022 година во 10 часот. Барањето во затворот е заведено со приемен печат на 14.12.2022 година.
Со оглед дека се утврдило дека овој акт е ист со претходно доставениот за расправата која била на 23.11.2022 година закажана за 12.12.2022 година, заклучено е дека веројатно се работи за грешка, особено поради фактот што ни судот не ја воочил грешката и не доставил исправка на овој акт.
Имајќи предвид дека КПД Струга претходно постапувал уредно на сите судски барања, а во овој случај не се работи за погрешно постапување, туку за превид на судските служби, Управата за извршување на санкциите не смета дека постои одговорност кај било кој вработен во КПД Струга, информираат од Управата за извршување на санкциите.
Оттаму додаваат дека за ситуацијата разговарале и со осудениот Мијалков.
-Воедно е разговарано и со осуденото лице С.М за настанатата ситуација. Одговорните во КПД Струга денес по електронска пошта се известени за следната закажана судска расправа на 26.12.2022 година и спроводот на осудениот е веќе планиран, посочуваат од Управата.
Дали екс шефот на УБК Мијалков ќе се спаси од Титаник 2, каде се гони за противзаконито влијание во изборните нерегуларности во 2013 година?
