Комисијата за избори и именувања едногласно и без дебата донесе заклучок да му прдложи на Собранието да ја разреши специјалната јавна обвинителка Катица Јанева, која е осомничена за криминалната афера „Рекет“.
Одлуката е донесена врз основа на извештајот на Советот на јавни обвинители за разрешување на Јанева поради нестручно и несовесно работење.
Заклучокот на Комисијата ќе биде доставен до собранискиот спикер Талат Џафери, кој треба да свика пленарна седница за разрешувањето на Јанева. На пленарната седница нема да се расправа за извештајот на Советот на ЈО туку само за предлогот за разрешување.
Одлуката се носи со двотретинско мнозинство и со т.н. бадентерово гласање, а на крајот треба да ја потврди и Советот на обвинители.
Претходно пратеникот од СДСМ и член на собраниската Комисија за избори и именувања Костадин Костадинов на денешната седница на која се расправаше за Катица Јанев, побара изземање на претседателот на Комисијата, Илија Димовски.
– Би сакал да дадам едно укажување, а се однесува на Законот за спречување корупција и судир на интереси. Сметам дека вие треба да се изземете од водењето на Комисијата согласно овој закон и согласно етичкиот кодекс особено во делот на судир на интереси во членот 8 , рече Костадинов.
Тој предложи наместо Димовски, Комисијата да ја води Зоран Илиоски кој е негов заменик, а исто така пратеник од ВМРО-ДПМНЕ.
Претседателот на Комисијата, Димовски му одговори дека обврските на пратениците произлегуваат од граѓаните, но и доколку се следи неговиот предлог лично тој, но и други членови на Комисијата од пратеничката група на СДСМ би требало да бидат изземени поради сомнежи за вмешаност во случајот „Рекет“. Потенцира дека ВМРО-ДПМНЕ не побарало нивно изземање затоа што го почитува правото на презумција на невиност.
-Пратениците имаа потполно право да ги обавуваат своите обврски преку гласање, изјаснување, говорење или претседавање со одредени работни тела без никакво ограничување заради тоа што Собранието на Република Македонија е орган од највисок интерес составен врз основа на волјата на граѓаните, а не на било која друга институција, истакна Димовски.
Доколку го следиме вашиот предлог ќе треба и вие лично, но и поголемиот дел од членовите на Комисијата од СДСМ да бидат изземени бидејќи се инволвирани или имаат сомнеж дека се инволвирани во најновиот скандал рекет, истакна Димовски.
