Бројот на активни случаи на Ковид 19 во земјава продолжува да опаѓа. Вчера се регистрирани 6.318 активни случаи, наспроти 7.595 во претходното деноноќие.

Според последниот ковид-билтен на Министерството за здравство, од вкупно 234 нови позитивни случаи на Ковид-19 од направени 1.318 тестови во изминатото деноноќие, регистрирана е 31 реинфекција, има 12 починати лица и 1.491 оздравени пациенти. Согласно регистарот на умрени лица со дијагноза КОВИД-19 од „Мој Термин“, дополнително се пријавени пет починати лица во период од 14 до 18 февруари 2022. Кај сите 17 починати лица се регистрирани коморбидитети.

Серолошкиот скрининг на граѓани, кој се прави по случаен избори за испитување антитела е се уште во тек. Заклучно со вчерашниот ден, се собрани 800 примероци од жители на Скопје и 200 примероци од жители на Битола. До крајот на неделава се очекуваат првични податоци за серопреваленца во Скопје, а од следната недела и за другите градови од државата, информираа за МИА од Министерството за здравство.

Здравствените власти, викендот излегоа со оценка дека се намалува пикот на четвртиот бран и оти епидемиолошката состојба полека се подобрува. За евентуално олабавување на мерките за заштита ќе се чекаат резултатите од серолошкиот скрининг.

Во врска со скринингот на учениците за Ковид-19, од Министерството посочуваат дека тој вчера се спроведувал во основните училишта во Бутел, Кисела Вода и Чаир, а согласно планот, ќе продолжи и денеска. По обработка на податоците, јавноста навремено ќе биде информирана за наодите, како и за останатите аспекти од текот на скринингот, потенцираат од Министерството за здравство.

Досега во земјата се направени вкупно 1.871.411 тестирања на КОВИД-19, вкупниот број на КОВИД-дијагностицирани лица од почетокот на епидемијата изнесува 293.559, бројот на оздравени пациенти е 278.326, а на починати е 8.915.

Во меѓувреме, Словенија од вчера ги укина речиси сите антиковид мерки, освен носењето маски во затворени простории. Доказ за прележан ковид, вакцинација или негативен тест ќе се бара само во здравствени установи, старечки домови и затвори.

Според владината одлука од сабота, нема повеќе ограничувања за бројот на луѓе во трговските центри, угостителските објекти и какви било настани. Укинати се и ограничувањата на работното време во угостителските објекти, а ноќните клубови може повторно да се отворат. Се препорачува носење маски на отворено кога растојанието од 1,5 метри не може да се исполни. Ковид пропусници и негативниот тест остануваат задолжителни за персоналот во здравствените и здравствените установи, затворите и воспитно-поправните установи за малолетници помлади од 15 години. Учениците и студентите нема да мора да се тестираат во образовните институции, но маските се уште се задолжителни.

Бугарија објави дека влегува во втора и трета фаза од пандемијата, а се очекува земјата за краток период да стигне до првата фаза, што значи дека наскоро цела држава ќе биде во зелената зона. Како што изјави премиерот Кирил Петков, до 20 март ќе може да се укинат сите ограничувања во земјава, а зелениот сертификат ќе остане единствениот актуелен документ што ќе важи во европската регулатива за патување. Од 24 февруари, првиот чекор е секој објект во Бугарија да дозволи влез за лица без зелен сертификат, но за вработените ќе остане условот за зелен сертификат. Во образовните центри и училиштата ќе биде дозволено да учат до 12 деца.

Стабилизирањето на епидемиолошката слика и намалувањето на притисокот врз здравствениот систем на Кипар, носат и олабавување на мерките во оваа островска земја, меѓу кои и укинување на забраната за влез на невакцинирани во одредени простори. Олабавувањето на мерките стапи во сила од вчера, а веќе е дозволено влез во угостителските објекти, ноќните клубови, кината, театрите, на стадионите, на свадбите и крштенките и за невакцинирани лица , но со задолжителен рапид тест.

Британскиот премиер Борис Џонсон вчера потврди дека во следните неколку дена во Англија ќе бидат укинати сите мерки поврзани со пандемијата на Ковид-19.

-Сите заразени граѓани од четврток веќе нема да имаат законска обврска да се самоизолираат, иако, сепак, ќе им се советува да останат дома, изјави Џонсон и додаде дека бесплатната услуга за тестирање на коронавирус ќе престане да биде достапна од 1 април.

Масовни протести против мерките постојано имаше во повеќе европски земји, како и најмасовни во Канада и во Австралија.

Во Македонија минатата недела помалку заболени и починати од Ковид-19

Во периодот од 14 до 20 февруари регистрирани сe 6.119 нови позитивни ковид случаи, што е за 29,2 отсто пмалку во однос на претходната недела. Процентот на позитивност се движи од 16,7% до 31,1%, просечно 25,8%.

Според неделниот извештај на Институтот за јавно здравје,тестирани се вкупно 23.396 материјали во лабораториите во кои се спроведува молекуларно тестирање и антигенско тестирање за присуство на SARS-CoV-2, со намалување од 11,2% во однос на претходната седмица.

Најголем дел од регистрираните случаи се од Скопје (n=3.262; 53,3%), а највисока неделна инциденца е регистрирана во Неготино – 519,1/100.000, Скопје – 514,3/100.000 и Кавадарци – 507,4/100.000.

Регистрирани се заболени лица во сите возрасни групи. Најзастапена е возрасната група над 60г (n=1.482, 24,2%), а најмал број е регистриран кај возрасната група од 0-9 години (n=327; 5,3%). Се забележува намалување на бројот на заболени кај сите возрасни групи, со најзабележителен пад од 31,5% во возрасната група од 20-29 години и 31,2% кај лицата на возраст од 50-59 години.

Согласно новиот алгоритам за оздравување во текот на минатата недела со статус „оздравени“ се стекнале 8.797 лица во хоспитализирани услови или на домашно лекување. Во текот на минатата недела вкупно се пријавени 863 реинфекции, со намалување за 29,8% во однос на претходната недела.

Пријавени се 106 смртни случаи во 23 градови, за 27,9% помалку во однос на претходните седум дена. Најголем дел од нив се од Скопје (41). Во однос на возраста, најголем број (n=101; 95,3%) од починатите припаѓаат на возрасната група над 60 години, а регистрирани се починати лица и кај возрасната група од 50-59 години (4) и 40-49 години (1).

Во „Лабораторијата за вирусологија и молекуларна дијагностика“ при ИЈЗ, во текот на изминатата недела, кај 49 позитивни примероци на SARS-CoV-2 од болнички и примероци од пунктовите е направено PCR тестирање за детекција на Омикрон сојот.

Во 29 (59,2%) од испитуваните примероци е докажана BA.1 сублинијата на Омикрон. Во 20 (40,8%) од испитуваните примероци е докажана BA.2 сублинијата на Омикрон – позната уште и како „stealth“.
Заклучно со 20.02.2022, во земјава вакцинирани се вкупно 869.763 лица со барем една доза на вакцина против КОВИД-19. Комплетно вакцинирани (со две дози) се вкупно 848.573 лица, а со трета доза се вакцинирани 140.455 лица.