Во време кога модернизацијата, институционалниот интегритет и стратешкиот економски развој се од примарно значење, националниот давател на услуги во воздухопловната навигација М-НАВ АД Скопје добива исклучително засилување на своето раководно чело.
На 5 август за нова претседателка на Надзорниот одбор на М-НАВ е избрана проф. д-р Татјана Бошков.
Проф. Бошков зад себе има импресивна и богата кариера. Како редовна професорка на Универзитетот „Гоце Делчев“ и поранешна деканка со два последователни мандата, таа повеќе од дваесет години го трасира кариерниот развој преку современи економски истражувања. Нејзиниот научен и професионален фокус опфаќа макроекономска политика, меѓународни финансии, одржливи економски модели и креирање политики што носат мерливи резултати.
Нејзиниот избор на чело на Надзорниот одбор на М-НАВ АД Скопје доаѓа како природен след на нејзината исклучителна експертиза и докажани раководни способности. Покрај оваа висока одговорна функција, Бошков во моментот ја врши и функцијата заменик-претседателка на Советот за туризам при Министерството за култура и туризам и е ангажирана експертка во процесот на изработка на новата Национална стратегија за развој на туризмот на РСМ 2027-2032 година.
Во согласност со современите практики на корпоративно управување карактеристични за водечките европски воздухопловни институции, работата на новиот претседател на Надзорниот одбор се очекува да биде насочена кон континуирано унапредување на финансиската одржливост, транспарентност и стратешко планирање во М-НАВ.
