Заев мора да е уценет штом оди спротивно на волјата на 1,2 милиони граѓани, се истакнува во денешното соопштение од ВМРО-ДПМНЕ.
Најголемата опозициска партија потсетува дека на 30 септември 1,2 милиони граѓани на Република Македонија кажаа „не“ за промена на името, идентитетот, јазикот и историјата, не за откажувањето од македонското малцинство во соседството.
– Граѓаните кажаа не на капитулантскиот договор од Преспа и распродажбата на државните и националните интереси со единствена цел, спас на политичката кариера на Зоран Заев. Секој еден од пратениците се избрани од граѓаните, да ги претставуваат нив и нивната волја, а волјата на граѓаните е јасна, тие не го прифаќаат капитулантското дело наречено преспански договор, се вели во реакцијата.
Заев, тврди опозициската партија, мора да е уценет штом оди спротивно на волјата на граѓаните.
– Уценет за неговите криминали и криминалите на неговите сопартијци со кои само за година и половина спроведоа холивудски грабеж во Македонија. Граѓаните не може и не смее да ја плаќаат цената за концесиите на Заев, за неговата коцкарска all Il политика. Самоволието на власта мора да запре, Уставот и законите мора да се почитуваат. Заев се плаши од независно и објективно обвинителство, кое ќе го истражи случајот „Поткуп“, случај во кој цела држава го виде како бара поткуп од струмички бизнисмен во висина од 200 илјади евра, освен судот. Власта се плаши од правосудство кое наместо да ги амнестира криминалите на државните и партиските функционери на СДСМ ќе гони за сторените криминали. Правната држава ќе се врати само кога ќе формира независно обвинителство кое ќе ги истражи крвавите тендери, криминалните грантови и изборниот фалсификат на референдумот, се вели во соопштението.
Натаму се додава:
– Заев ја држи цела Македонија во заложништво, само поради свои лични и теснопартиски интереси. Граѓаните му го покажаа црвениот картон на СДСМ, време е тие да ја напуштат Илинденска бб. Тоа е единствен начин Македонија да победи, се вели во реакцијата на ВМРО-ДПМНЕ.
