Денеска е Меѓународен ден за борба против корупцијата, ден кога нагласено потсетуваме дека случаите на корупција се најподмолните закани за општеството, напиша премиерот Зоран Заев на својот Фејсбук профил.

-Денес постои сериозна политичката волја и подготвеност за справување со корупцијата во нашата земја, верувам, како никогаш до сега. Тоа го докажавме во повеќе случаи кога во јавноста беа покренати сомневања за судир на интереси или несовесно работење кои ја отвораат портата за корупција. Бескомпромисна борба против корупцијата ќе постигнеме само со транспарентни и отчетни институции. Такви мора мора да бидат сите институции, вклучително и тие во судството и обвинителството. Со храбра антикорупциска комисија како што имаме сега, сите институции треба да покажат отпор кон корупцијата и кон конфликтот на интереси, вели Заев.

Ако за тоа нема волја, или ако антикорупциските механизми се попречени на било кој начин, како што посочува Заев, оваа општествена болест ќе ги опфати сите витални делови на заедницата и ќе биде закана за нејзиниот развој.

-Затоа е важно да започне постапката на проверка на имотот на судиите и обвинителите, колку може поскоро. Важно е да се утврдат конфликтите на интереси и во правосудството. Секој судија и обвинител треба да ги декларира сите адвокати, правни застапници и обвинители од своето опкружување со кои на било кој начин се поврзани, или биле поврзани, во судските постапки што ги воделе. Само со ангажираност и подготвеност на сите институции ќе успееме да ја запреме корупцијата, напиша Заев на својот Фејсбук профил.

Како што е познато, Заев досега неколку пати имал „проблеми со корупцијата“, еднаш беше аболициран од тогашниот претседател Бранко Црвенковски во аферата Глобал, а подоцна против него беше поведен судски процес во аферата „Поткуп“. Но, откако стана премиер, беше ослободен и од тоа обвинение.