Зоран Заев на денешната билатерална средба со германската канцеларка Ангела Меркел, ги изнесе позициите на Република … Македонија во однос на потребата за забрзување на евроинтеграциските процеси и за што побрзо решавање на проблемот кој го наметна соседна Бугарија. Како што се наведува во владиното соопштение од средбата, Заев нагласил дека единствен прифатлив предлог за нашата земја за надминување на блокадата на проширувањето на ЕУ со земјите од Западен Балкан е предлогот претставен за време на претседателството на Португалија со ЕУ, со кој се почитуваат заложбите и на двете страни за унапредување на меѓусебните односи и за евроинтегративните процеси во регионот.

Владината делегација предводена од премиерот Заев заедно со заменик-претседателот на Владата задолжен за европски прашања Никола Димитров и министерот за надворешни работи Бујар Османи попладнево по официјалниот работен ручек остварија билатерална средба со германската канцеларка Ангела Меркел во Тирана. Меркел е во посета на Западен Балкан и се сретна си лидерите на земјите од регионот на кој главна тема беше регионалната соработка.

На билатералната средба, премиерот Заев исто така се осврнал и на иницијативата Отворен Балкан која се темели токму на принципите на функционирање на Европската Унија.

-Нам ни е потребно што е можно побрзо решавање на политичките пречки и интегрирање на … Македонија во ЕУ. Ние успешно ги завршивме нашите домашни задачи, но тоа не значи дека запираме тука, напротив секој ден работиме и се бориме за подобро утре за нашите граѓани, истакна премиерот Заев на билатералната средба со канцеларката Меркел.

Канцеларката Меркел, како што се наведува во соопштението, се согласи со владината делегација дека ЕУ интеграцијата и на Македонија и на регионот не смее да продолжи да се одложува и дека постојаниот напредок е нотиран од страна на сите релевантни европски институции и меѓународни партнери на државата.

Заев и канцеларката Меркел разговарале и за трговската размена помеѓу двете држави и за дополнително унапредување на економските инвестиции во државата со оглед на поволната бизнис клима која ја прави Германија број еден трговски партнер на Македонија во континуитет со години.

Во соопштението се посочува дека на средбата премиерот Заев се заблагодари за личниот ангажман на канцеларката Меркел за нејзината севкупна посветена работа и непроценлив придонес за зајакнување на односите на СР Германија со Македонија, како и за нејзината поддршка и поддршката на нејзината земја на нашиот пат до членството во НАТО и во процесот за членство во ЕУ.