Украинскиот претседател Володимир Зеленски го искористи своето обраќање до нацијата по повод 35-годишнината од независноста на земјата за да му упати директен предизвик на рускиот претседател Владимир Путин, изјавувајќи дека Москва мора да биде турната на колена преку единството на меѓународната заедница.

Додека европските лидери се собраа во Киев за да ја одбележат годишнината, Зеленски ја пофали „отпорноста“ на украинскиот народ за време на повеќе од 1.640 дена војна, во 20-минутното видео објавено на социјалните мрежи.

– Во сите свои планови за Украина, Путин згреши во најважното нешто – рече Зеленски, објаснувајќи дека Русија го потценила украинскиот народ, пренесе ДПА.

– Непријателот ги пресметуваше нашите ресурси, нашите резерви, нашата опрема, но не го зеде предвид тоа што беше клучно: луѓето, најголемото достигнување на украинската независност. Луѓето кои ја сочинуваат нашата држава. Луѓето кои преземаат одговорност. Луѓето кои не ја сакаат Русија овде и кои се борат со сите сили за мир и независност-истакна тој.

Путин сакаше да ја направи Русија голема, рече Зеленски, но денес во таа земја има долги редици на бензинските пумпи, додека неговите војници се претвораат во „ѓубриво“ на бојното поле од страна на армијата на Киев.

Украинскиот претседател ги истакна достигнувањата на земјата во петтата година од војната, која Русија ја почна во февруари 2022 година.

„Украина веќе реши проблеми кои првично изгледаа невозможно да се надминат“, објасни тој, наведувајќи ја одбраната на земјата од дроновите „шахед“ од иранско производство.

„Нашата одбранбена индустрија денес е вистински џин кој кова независност 24/7“, продолжи тој, истакнувајќи ги роботските возила, поморските дронови, нападите од среден домет врз руската логистика и нападите од долг домет врз рафинериите за нафта на непријателот.

Зеленски призна дека ситуацијата е „навистина многу тешка за сите нас“, но уште еднаш го одби барањето на Русија Украина да ја отстапи Доњецката област.

Никој не верува дека тоа би ја завршило војната, рече Зеленски. „Ние не им веруваме.“

Украина стана различна земја и нема ништо да подари. Земјата „не е жртва, туку борец“.

Зеленски упати посебен апел до раководството во Пекинг, кое го поддржува Путин. „Кина повеќе не треба да молчи“, рече тој.

„Кина мора да ја докаже својата амбиција да биде еден од светските лидери, не само економски и технолошки, туку и како цивилизација, ставајќи до знаење дека ниеден диктатор нема право да ѝ се заканува на планетата со своите стари боеви глави.“

Тој исто така ги пофали САД под претседателот Доналд Трамп, изјавувајќи дека му е „драго“ што земјата ги отфрлила илузиите за Русија и разбира дека Путин не сака да ја заврши војната.

„Русите мора да бидат донесени на преговарачката маса. Конечно мора да има санкции што ќе ги натераат да завиваат“, додаде украинскиот претседател.