Украинскиот претседател Володимир Зеленски изјави дека денешниот напад со руско беспилотно летало во регионот Хмељницки, најверојатно, бил насочен кон областа на нуклеарната централа и дека тоа е доказ дека на Русија ѝ се потребни построги санкции.
„Најверојатно цел на овие напади е нуклеарната централа Хмељницки. Ударниот бран од експлозијата ги тресеше прозорците, вклучително и просториите на нуклеарната централа“, рече Зеленски. Тој додаде дека секој руски напад, особено оној што ќе се осмели да цели на нуклеарна централа и други критични објекти, служи како доказ дека притисокот врз терористичката држава е недоволен.
Силните експлозии во близина на местото на нуклеарната централа Хмељницки во текот на ноќта ги оштетиле прозорците, но не влијаеле на работата на централата или на нејзиното поврзување со мрежата, соопшти нуклеарното тело. Експлозиите привремено ја прекинаа струјата на некои станици за следење на радијацијата, соопшти Меѓународната агенција за атомска енергија (МААЕ).
„Фактот што беа уништени многу прозорци покажува колку блиску се случи експлозијата. Следниот пат нема да имаме толку среќа“, заклучи директорот на МААЕ, Рафаело Гроси.
