Техничкиот премиер Оливер Спасовски денеска изјави дека Владата посветено работи против коронавирусот, а за објавената бомба за Антонио Милошоски рече дека не ја слушнал.
– На дневна основа се следат сите аспекти во однос на корона вирусот и доколку има било каква потреба за зголемување на мерките со цел заштита на здравјето на граѓаните тоа ќе биде направено. Знаете дека максимално посветено се работи и од Министерството за здравство и од Кризниот штаб. Како Влада вчера дадовме препораки дека продолжува за една недела препораката до сите кои организираат настани на затворено и спортски натпревари без публика, изјави Спасовски.
Прашан дали ќе биде носител на листа во втората изборна единица Спасовски, рече дека за тоа ќе треба да се почека одлуката во партијата и оти се ќе биде познато во понеделник.
Во однос на објавените „бомби“ за Антонио Милошоски за кои тврди дека се дел од материјалите предадени на СЈО, Спасовски рече дека се што имале СДСМ го предале на СЈО.
– Јас не ги слушнав и не знам за што се работи, само знам дека се објавени некакви материјали. Повикувам институциите да истражат, да видат кои материјали се, какви се, од каде се објавени и да преземат соодветни мерки. Нулта толеранција за оваа работа. Институциите треба да работат ефикасно и да ги откријат тие кои ова го прават, и врз основа на тоа да преземат соодветни санкции, изјави Спасовски.
